A feuille de bois canon
Neige vole en vers
C'est la saison
Essuie la vitre
Et d'un seul bond
Virent et révoltent
Les cloisons
Tu vibres à l'ombre
C'est évidence
T'élève sombre
En transparence
Pile où s'enlacent
Clair et pénombre
Valsent en nasses
Cases-catacombes
M t anvi ofri w
Yon ti moso syèl ble
san zèklè ni lapli
men m pa rive pi lwen
ke niaj yo
Alò m pran lakansyèl
depoze l nan pye w
m t anvi ofri w
yon ti frechè lotòn
yon ti van k ap fè toubiyon
ak fèy bwa tout koulè
alantou lavi w
yon ti sant choublak
melanje ak ilan ilan
sèl sa m jwenn
se fredi Nouyòk
ki anviwonnen m
m t anvi ofri w
yon powèm
ki fèt ak mo dous mo pike
Yon powèm kote nou pèdi
andedan chak grenn fraz
chak panse chak souf
yon powèm kote mo pa w ak pa m
akouche yon deblozay
yon eskandal
yon rayisman
yon kè grenn
men m sèlman twouve
de ti mo ki pa long ase
pou eksplike w lanmou
m t anvi pèdi
nan plim je w
kwoke nan ren w
tribiche nan de bra w
al tonbe nan kè w
m t anvi kase yon ti moso nwèl
depoze l nan men w
eseye envante yon ti Manatann
yon ti Pòtoprens
yon ti vil Okay
melanje yo jiskaske
yo tounen yon sèl peyi
mezi pou mwen avè w
men yo bonbade Manatann
yo kidnape Pòtoprens
yo bliye vil Okay
de pòch mwen lanvè
poutan pou fèt nwèl sa a m ap ba w
yon ti gout lespwa
yon ti tak memwa
yon kolosal lavi
yon dividal lanmou
yon ti zyedou
yon ti silans
yon ti souri
yon ti apiye
yon ti tèt kole
yon ti bouch bèbè
yon ti frison
yon ti mistè
yon ti antre soti
yon ti ale vini
yon ti renmen
renmen pou lavi
Jeanie Bogart
Disque "Dènye Rèl"
Editions Encre de Chine, NY
