TANBOU-A PALE

tanbou-a pale
Ti-Roro fè
tanbou-a pale
nòt yo leve
yo mache
y'al sote
sou Sò Yaya

yo rantre
nan kòlèt li
yo jwe anba vant li
teke zantray li

Sò Yaya
alèkile
avèk de bra-l anlè
k'oun pè k'ap preche
kòmanse gouye

pli nan vant li woule
kou vag sou lanmè
souf li kou timoun
k'ap sote kòd

lò misik la fini
figi Yaya w'a di
oun fanm ki
fèk fin fè lanmou

Yo di
san kretyen
enrichi
latè
Si sete vre
si sete vre
mezanmi
ala diri
pitimi
ak mayi
ki ta genyen
lan peyi
Dayiti.

Teneb Teneb

Se lan ri St Honore
tape a komanse
ri reyinyon reponn

toupatou
se kowkow kowkow
kowkow kowkow

Ti moun granmoun
travayè lokatè
chofè faktè

komèsan chalatan
abitan Dirijan
Tout ap tape

Yo tape
sanrete
yo tape
jous Bondye
lan syèl la
tande.

      

Traductions

• Avetisman from ZINGLIN By Rudolph Muller.
   

• Chan-Dayiva by Pierre Richard Narcisse.
   

• moin minme ous minme li minme yo minme from DIACOUTE 2 By Felix Morisseau-Leroy.
   

• oun ti bonhomme qu’ap jouer from DIACOUTE 2 By Felix Morisseau-Leroy.
   

• The Cross from DIACOUTE By Felix Morisseau-Leroy.

      

Bibliographie de la famille Baron