Potomitan

Site de promotion des cultures et des langues créoles
Annou voyé kreyòl douvan douvan

Latè ka fann

Max Rippon

Mi karenm rivé
Solèy ja ka wonpi  latè
Bik a ziyanm fal ouvè ka kraké anba chalè
Mi karenm rivé
Manzè-mari pikan ovan doubout djòk
Solèy pa pèd tan pou fann lèv a tras kann
Bèf ozabwa san zanma ja mèg an do
Chwa-chwa patagon é zèb-gras
Rantré zèl kon kongoliyo kapon
Sé karenm ki fè si dlo ravin vin ra
Pi an fon lakou ja ka mò swèf dlo
Fèlè a sitèn ka fann kon fann fèt
E latè ka pran fè zévan ouvè si kraché difé
Chalè ka fè bannélo mòlòkòy pran lavandé
Anba touf pyé-a-poul chòv
Lanné-la-sa osi kon dépi kèk tan
Mouch ké sousé san séché an do a bèf lafen rann tizi
E moun ké mété men si tèt pas bésyo ka mò swèf an savann
Pétèt fò nou pran douvan é débité vyann-si-pyé kòchté an pyé-mango
Avan twota baré nou é kòd a yanm maré yanm
Pétèt fò nou koumansé voyé bèf é kabrit manjé zèb an montangn
Pétèt pou dlo arèsté vin ra
Fò nou kiré ma é paré lapli anba goutyè banbou
Pétèt fò nou sonjé bwaré doukou é moli si bonbansé
Pétèt fò nou fasadé épi jan nou ka viv pou nou viv jan nou yé

Max Rippon
Durocher le 14 avril 2012

boule

 Viré monté