Ou ka mandé-mwen di-w
ka kréyòl yé ban-mwen
kijan, kitan an ka palé-y ?
Ola é ba kimoun ?

*

Alatraka ! Mi bab mi !
Pou mwen kréyòl sé pou andidan kaz
Kréyòl sé pou zéklari
oben pou zéklè-kòlè !

*

Kréyòl sé pou di mèsi onpil
oben pou gouté plézi omil
Sé pou di san bizwen palé
kijan moun a-w ka chouboulé-w
menmjan ou ka voyé ba
on moun
lè i ka tèrbolizé-w.

Kréyòl an-mwen pa soulyété
Kréyòl an-mwen pa chapoté
I pa ni ni bouch fardé
ni zong verni.

I pa ka polké èvè Lisifè
pou i dansé èvè Makmawon.

*

Lè an ka désann Babilòn
Adan biwo lànmistrasyon
Si ou vwè-mwen si talon ho
ka zinglété
Sé an Fwansé an dégizé.