Abo di
kréyòl
a pa on mo pou di
anni on lang !

*

Abo fè
kréyòl
a pa anni pawòl
pou manjé
bang é flang !

*

Abo di
Abo fè
pwan-y si ou vlé
anparabòl
nou érityé-y
tousèl-tousèl a-y
anpichtray.

*

Tan fè tan
Tan kité tan
I sòti an Kao
I rive lòtbò dlo
San chigné é san plenn
I pa rete antòch
I dérifizé fèmé-y asi-y menm
I rété gran wouvè
pou nou alé-vini
I ban-nou tout fòs a-y
E nou rédé-y trasé
pou té fè chimen a-y.

*

Kréyol an-nou pwan souf
I pwan fòs
i rivé fè kò a-y
I pwan Limyè-lavi
i fè Lèspri èvè-y.
Adan on zéklari
i tijé pou kléré
limanité.

*

Alòs
Sonjé
Sé-y
I ka di o nou té yé
o nou sòti
o nou k’alé.

(Kapèstè 25 mé 2013 Ektò Poulé dapwé Wòzlèn)