Konpè, mi ou rivé
           an mitan jaden Jak
An té ké bizwen sav
            si sé sa ou té vlé
Avan kriyé woulo
              avan sonjé di hak
Di-mwen Konpè ou blèz
              yo pa fèmé-w aklé.

An té ké bizwen sav
               si sé sa ou té vlé
Ou pa pri an zatrap
                yo pa pwan-w an p'on lak ?
Di-mwen Konpè ou blèz
                yo pa fèmé-w aklé.
Vou, on chouval-savann
                 yo pa mété-w an pak ?

Ou pa pri an zatrap,
                  yo pa pwan-w an p'on lak.?
Pou fè-w rété-trankil,
                  pou opozé-w wouklé
Vou, on chouval savann,
                  yo pa mété-w an pak ?
Di-mwen kijan ou yé,
                   Konpè tanpisouplé !

Hector Poullet
avril 2013

 Viré monté