Chanp’art

Hector Poullet

1. Noutout, nou pé fè chanp an-nou, noumenm an-nou, san nou oblijé ay péyé ho konsa lajan épi wou fè boutèy rantré an péyi-la pou apré nou pa konnèt ka pou nou fè èvè sé boutèy vid-lasa.
    
2. I pé ké tini  étikèt a pon gran mak, i pé ké ni pon bèbèl, ni branbrann asi boutèy-la mé i ké plibon pou santé an-nou, davwa i pé ké ni pon kalité biten nou pa konnèt adan-y. Epi i ké gadé sé lèvi-la adan-y, kivédi sé piti tichanpignon-la nou bizwen an boyo an-nou la pou nou rété an santé.

Pou sa mi ka pou fè :

• Pwan on boutèy (75 cl, 12 °) diven blan sek, bon kalité si ou pé.
• Vidé-y adan on boutèy a dlo an plastik (150cl)
• Soukré diven-la byen soukré, épi lésé-y débouché pannan 15minit pou souf-la (SO₂) yo té mété adan diven-la ni tan vaporé.
• Pwan on vè dlo (dlo i pa ni javèl adan) apwochan 10cl, mété dé kyuiyè sik blan (apwochan 10g) fonn adan dlo-la.
• Vidé dlo sikré-lasa adan diven-la. (an moman-lasa, diven-la i té a 12°, ka touvé-y apwochan 10° é lè ou ka gouté-y, i ni on gou sikré)
• Pannansitan ou té mété on saché lèvi (saccharomycès èspésyal pou fè diven pétiyan (ou ka achté-y asi entewnèt aka Gervin yeat) gonflé adan on vè dlo épi on ti kyuiyè sik.
• Ou ka mété dé kyuiyè a soup lèvi-lasa adan diven-la, ou ka soukré tousa byen soukré.
• Epi ou ka vidé tousa adan on boutèy a chanpangn, fèmé byen fèmé la. (pa plen-y ora gyèl)
• Landèmen wouvè boutèy-la jistikont pou lésé tibwen gaz chapé, épi woufèmé-y
• Atann omwens 3 simenn avan on désidé bwè chanp a-w.  Mé penga lè ou ka wouvè-y.

Pa bwè-y tousèl a-w, i plibon si ou ni zanmi pou bwè-y èvè-w ! Epi apré montré-yo fè-y. 

 Viré monté