| Kaz | Enfo | Ayiti | Litérati | KAPES | Kont | Fowòm | Lyannaj | Pwèm | Plan |
| Accueil | Actualité | Haïti | Bibliographie | CAPES | Contes | Forum | Liens | Poèmes | Sommaire |
|
Avril
Cananga odorata - Annonaceæ - Ylang ylang. Photo Geneviève Poullet. |
 |
«An avril pa pèd fil a-w!
Dlo pé’é chayé sa i la ba-w!»
Tan ja fè tan
Tan kité tan
Tan-la adan on kouskouri
Tan pa’a ban-nou tan fè kalkil
E mi nou ja an avril
Bèl pasaj
Niyaj é lalin
Ka fè kouboulin
Touloulou bousyè
Pou mawon chalè
Ilan-ilan ka bay lodorans
Wòch-rivyé an lopilans !
O tan k’alé ?
Toutmoun omil
di ola tan-la ka pasé ?
Tèt-mòn karenm sòti kasé
E mi nou ja an avril
Bèl pasaj
Anvil ka fè cho
Annou òbò dlo
Bengné an rivyè
Dòmi bodlanmè
Bwè, manjé, péché, dansé é ri
Avril sé pou jwi-lavi !
Tan ka pasé
Tan ka vansé
Omil di o tan-la k’alé
Pa pèd fil a-w annou alé
Pa pèd tan ka kalkilé.
Ka fè cho anvil
Nou ja an avril
Annou bò rivyè
Pou mawon chalè
Annou viv lavi-la aladous
Aresté viv alakous.
Nou ja an avril
pa bizwen kalkil
si ou annimè
annou bòdlanmè
Lalin-la ja pwan on koulè myèl
Gadé jan syèl avril bèl !
Hector POULLET