Tibrinas :
anba bwa
adan hazyé
ja ka fè nwè.
Dé zyé klérant
akwèdi on zétwèl-filant
ka siyonné nwèsè-la.
On tigason
dèyè tikaz a granmanman-y :
on tizon-difé
adan on men
ka fè-y alé-vini
atoupannan i ka chanté :

– «labèl ting-ting bwa !
   ting-ting bwa ! ting-ting bwa !
   an ké ba-w manjé bwa pouri !»

Dé zyé klérant-la pwoché
mèyè pou kouté
oswa pou gadé.
Tigason-la ka anni pongné-y !
Labèl-la ka fè:

– tak-tak !
– tak-tak !

Tigason-la ka mété-y adan on boutèy.

Oswè-la
on tiigason an kabann a-y
ké dòmi èvè dé zyé klérant
ka véyé sonmèy a-y
adan nwèsè a tikaz-la
dèmen maten i ké lagé labèl
pou manmzèl ay fè zafè a-y.

An tan-lasa pòkò té ni lèktrisité
ni gwo limyè jan nou ni
jòdi
toupatou lannuit
pou fè labèl pè.
Zétwèl ki zétwèl
an gran syèl
ki Gwokato
ki Lapousinyè
simétan kaché kò a-yo
dèyè niyaj
pou tout pakyé limyè an-nou
pa vèglé-yo.

Sé dépi sa
Nou vin konsa :
nou fin gadé syèl

Hector Poullet
avril 2013