Noutout ka sonjé istwa on gwounouy a gwotèt
i té vlé gonflé k’on pèlpèt
pou i té rivé vini gwo k’on bèf.

Jòdi-la sé on bann jenn gwounouy ka désidé
fè on kouskouri :

On kouskouri-alamonté
a prèmyé kay rivé an tèt-kloché légliz-la !

— Bim ! Yé pa !  Kous-la pati !

Lavwa bay, moun sanblé pou gadé sa.
Tout kalité moun té la.

Jounalis télématik-sinéma-radyo bwapatat té la.

Moun ka sipòté.
Moun ka rapòté.
Moun ka komanté :
Moun ka sèmanté :

— Olagya ou ké jen vwè on gwounouy rivé an tèt a kloché-a légliz a Bondyé !

— Sa pé pa fèt !

— Gwounouy wi ? Zòt ka fè lafèt ! Awa sa pa andwa rivé fèt !

Atoupannan sé gwounouy-la ka èché monté
yo ka tann sé palé-lasa.
Mizi an mizi yo ka tann
yo ka kouté
yo ka kouté pou tann
yo ka pèd-lafwa.
Yonn-yonn yo ka pèd-fòs
yo ka bandonné
yo ka soté-atè
yo ka déviré-désann.
Kifwvwè anfinal yotout touvé-yo anba.

Yo tout pèd konba.
Yotout annisòf yonn.
Tousèl tousèl a-y
i kontinyé alamonté san krazé kò a-y.

Epi…woulo !
Mi I rivé an tèt a tèt a kloché-légliz la !

Toutmoun bay waka.

Lè i désann
on Gwounouy jounalis
pwoché pou mandé-y :

— Manzè Gwounouy ola ou pwan fòs pou té rivé fè sa ponmoun pa rivé fè la ?

— Kilès ? Ka ou ka di ? Palé pli fò, an pa ka byen tandé !

E wè ! Mi sé sa i té fòs a konmè Gwounouy-lasa. I pa té ka byen tann, kifè i pa pèd tan kouté pawòl initil moun té ka voyé labou pou té fè-y pèd lafwa, fè-y pèd fòs !

Zòt konpwann :

Adan lavi, sé fè sa ou ni pou fè
san pèd tan kouté palé initil a moun ka chèché fè-w pèd fòs.
Davwa yomenm a-yo pa néta fè sa vou ou ka chèché fè
yo pa vlé vwè ponmoun réyisi fè-y.

   

Viré monté