Sé konsa désèten moun
ka kriyé-mwen.
Tini dòt moun
déparfwa ka di
Kalpata !
E menm ni lésèz ka di
Kalfata !
Kèlanswa
tanpisouplè
pa pwan mwen pou Manséniyé.
An pa ni hak kont vwazin an-mwen lasa
mé an pa vlé an p’on jan
moun pwan mwen pou on pyébwa
ka fè toutmoun pè.
Dabò pou yonn gadé-mwen byen
an pa doubout dwèt menmparèy èvè-y
souvaman an ka pwan on pòz on jan kanté
dapré jan van-la ka souflé
pas an ka pliyé san kasé.
Epi osi fèy an-mwen potré èvè on désen
A las di kyè adan jé kat !
Bwa an-mwen sé bwa rèd
Pou fè pouli oben toupi.
Epi  ankò
a pa pou malpalé vwazin an-mwen
sa vré nou enmé pousé bòdlanmè
mé mwen an pa bizwen pwazonné
tout kò an-mwen é jis lonbraj an-mwen
pou opozé ki bèt
ki moun
chèché pwoché-mwen.
Dayè an ka fè bèl flè
Jòn dèwò é andidan wouj
ka sann flè a dé kouzen an-mwen
Koton é Gonmbo
flè an-nou pòtré-kraché.
Pa obliyé nou anfanmi
èvè Gwozèy é Wozkayenn.
Epi  fo sav
a pa pou hak
sé grangrèk-la kriyé-mwen
« Pyébwa bondyé¹»
Epi ankò, zòt ka toukonpwann
 si misyé Jandab²
li évè madanm a-y
enmé vini an lonbraj an mwen
pou yo fè zafè a misyé é madanm
sé byen poudavwè lonbraj an-mwen
dous pasé siwo-miyèl.
E si zòtmenm a-zòt
ni on Doudou
zòt vlé vini dousiné bòdlanmè
pa bizwen pè
pé pa ni pli méyè koté
pasé anba ola ka fè fré
féyaj an-mwen
mwen  Katalpa !
Kalpata !
Kalfata !
Maho bòdlanmè !

Zòt pa ka kwè ?
Vini
zòt ké vwè.

Notes Thespesia (du grec «thesbesios»: divin (parce qu’on plante cet arbre dans les Indes Orientales autour des temples) populnea qui tient de la nature du peuplier.   Pyrrhocoris apterus: est appelé gendarme à cause de sa ressemblance avec les gendarmes suissse du Vatican, on l’appelle également «masque nègre».                 Pyrrhocoris apterus. Photo Thierry Negi.

Thespesia populnea. Photo F.Palli.

Pyrrhocoris apterus. Photo Thierry Negi.

Pyrrhocoris apterus. Photo Thierry Negi.

Viré monté