Potomitan

Site de promotion des cultures et des langues créoles
Annou voyé kreyòl douvan douvan

Calendrier des Insolites
Avril 2017

Dé Léza

Hector Poullet

Iguana iguana

Iguana delicatissima. Martinique 2015, photo Christophe Auguste.

« Sa i pa bon pou zwa pa bon pou kanna ! »
Mé si nou pwan tan kalkilé nou pé di osi :
« Sa i bon pou zwa, bon pou kanna. »
Menmjan la :
« Zafè kabrit sé zafè mouton ! »

Anni gadé.
Asi on lilèt lanmè Karayib
On jou
Dé léza
on mal é on fimèl
 vini kontré
Yo pa té toutafètman menm
kanmenmsi anvérité
yo té léza zéwofòt.
lè ou té ka byen gadé
yonn té pli mastif
èvè on koulè plis gri-blé.
Annou kriyé-tala Fran-léza1.
Lòt-la plis légant-légant
on koulè vèr-jòn.
Annou kriyé-sila Léza-légans2.
Kèlanswa
yonn é lòt touvé-yo
Agou a-yo
dakò pou yo té fè sa
é sa i té pou fèt fèt !
Kèk tan apré rivé
Man Légans ponn on èksétéra zé.
Lè zé vini pou  éklò
Zékal-zé  fann
Zékal-zé wouvè
Zékal-zé mété dèwò
on kyolé ti Léza bata !
Toupòtré èvè papa
kanmenmsi
yo té ka sanmm manman .
Yo té ké pé kriyé-yo  
Léza Fran-Légans !3

On nonm Linivèsité vwè sa i di :
Sa pa dwètèt kontinyé
migannaj-lasa ké rivé
fè disparèt ki Fran-Léza
Ki Léza-légans
pou rété anni Léza bata
Awa !
Fo-nou opozé sa kontinyé konsa
Pou sové chak ras léza.
Alò i séparé-yo
I mété Léza- Légans asi on lilèt
é Fran-Léza asi onlòt lilèt
Asèlfen yo arèsté fè ti Léza-bata !

Ay konpwann poukisa
Nonm toujou bizwen séparé.
Sa lanati pa janmé  
mandé-y fè !
On maladi nou ni
toujou chèché
mété bayè !!!

Iguana iguana

Iguana iguana

Iguana iguana. Photos Francesca Palli.

Notes

  1. Il s’agit de Iguana iguana dit Iguane commun.
     
  2. Il s’agit de Iguana delicatisima ou Iguane des Petites Antilles.
    Source: Histoire naturelle des Amphibiens et Reptiles terrestres de l’archipel Guadeloupéen. Michel Breuil. Museum National d’Histoire Naturel, Institut d’Ecologie et de Gestion de la Biodiversité. Service du patrimoine naturel.
     
  3. Fran-légans est un hybride de igwana et de delicatisima.

Iguana delicatissima

Iguana delicatissima. Photo Thomas Latgé.

Pour plus d'information:

Les iguanes des Petites Antilles et les iguanes communs

Réseau des iguanes des Petites Antilles

Viré monté