Douvan jou :
t’alè moun an kaz-la
kay lévé
yo ké bizwen dlo pou yo
débabouyé.
Pa tini dlo adan bari-la !
Yèswa
lapli-la pa bat tòl-la.
 Anni on ti fifin a lapli i tonbé.
Fo ay chèché dlo
an rivyè-la
an pyé a mòn-la.
Pa ni p’on pann
p’on danmjann
an kaz-la !
Anni twa gwo koko-kalbas
épi on gran pannyé.
Pwan yo
désann mòn-la
vitman-présé
ay an rivyè-la
pwofité
débabouyé figi a-w
lavé-w alakous
épi
plen sé koko kalbas-la
èvè dlo a rivyè-la.
Byen kwensé-yo adan pannyé-la.
Pokosyon pou yo pa chalviré.
Dé branch feyaj adan yochak
pou opozé dlo-la soukwé-voltijé.
Chajé-w tousèl tousèl a-w.
Pozé pannyé-la asi on jounou 
pou konmansé épi apré
voyé-y monté
asi tèt a-w !
Wopso !
Annou-vwè !
Pati alamonté
Dousouman.
Tèt a-w byen dwèt
pou près ayen dlo pa débòdé.
Rivé anho
bò kaz-la
près san ou mouyé.
Pokosyon !
Déchajé pannyé-la
san fè twòp dlo tonbé.
Eben mi-w wi ! 
A pa-w sa alòs ?

Mi konsa an tan lontan
Moun té ka 
 chayé dlo an pannyé.
Tousa avan ou té paré zéfé a-w
Pou ou té pwan chimen lékòl.

Photo Geneviève Poullet.

 Viré monté