On boloko té enmé ay lachas an bwa.

Dé ou vwè sézon-la té wouvè
Monkonpè té ka ékipé-y
bòt an pyé a-y
kasyèt a-y visé asi tèt a-y
lenj kamouflaj anmidonné rèd asi-y
kawtouchyè alantou ren a-y
plen bal pou pa i lésé p’on tou vid.

Fizi a dé kou kalib dizuit
Kasé asi bra a-y
misyé ka siflé chyen a-y !

E mi yo ka pati alamonté
pou rivé an bwa Moro.

Ka yo kay chasé ?
Dé  ranmyé kou-wouj ?
 On pèdri kwasan ?

Sansa boug an-nou ké tiré
asi tousa i ni ki plim
Ki pwèl
Ou pa jen sav
rakoun
chat mawon
é siwvwè hak pa hak 
manglous penga !
Manfou a kyou mèl i pwan plon !

Mi rivé yo rivé dèyè on touf zikak
Dé gouti ka channda douvan chasè-la
E chyen a-y.

On Gouti ka pwan chimen adwèt
Lòt gouti-la li
 sé chimen agòch-la i ka pwan.

Misyé ka désidé suiv prèmyé-la
I ka fè Radégonn –  non a Chyen-la -
sign pwan dèyè dézyèm-la.

Si zòt pòkò janmé vwè gouti kouri
zòt pé pa konpwann
chaklè on gouti ka fè on so
sé konsidiré sé volé
i ka volé.

Chyen-la pwan kouri dèyè dézyèm gouti-la
Mé on lè i ka touvé-y ka kouri dèyè prèmyé-la
poudavwa dé gouti jwenn asi on menm chimen
yo ka fè zéklè !

Konpè Chyen pa ka janmé japé
lang a-y ka trenné atè.
Sé konsa mèt a-y toujou montré-y fè.

On lè
Chasè an-nou la ka vwè on biten
ka gwouyé anba on touf pyé gouyav.

Pou-y,  chyen a-y lwen douvan ka kouri
dèyè lòt gouti-la.

Ou  anni tann
Vim ! Vidim !
Radégonn tonbé blip
i mò fwèt !
Misyé èstébékwè
woté kasyèt a-y
graté tèt a-y !

I sonjé on tipawòl ka di :
« Pa jen fè chyen a-w kouri dèyè dé gouti
ou ka pèd ki chyen ki gouti ! »

Notes

1. Gouti: agouti, Dacyprocta aguti. Mammifère de l’ordre des Rongeur.
    
2. Inventaire et statut des Mammifères des Antilles françaises.
    
3. Les espèces de mammifères des Antilles françaises sont-elles toutes des «espèces exotiques envahissantes»?

Viré monté