Ou pé rivé monté asou bout pyé-w tout mòn,
Ou pé viré désann asou bol-jounou an fon-an

Ou pé fè goj anlè zétwal
Ou pé kriyé an fon kannal

Ou pé kwè kò-w akondi an wa
Ou pé pansé ou piòpiò

Ou pé bay volé épi zwézo
Ou pé ralé kalpat épi ravèt

Ou pé ba moun lod
Ou pé bégéyé kon kapon

Ou pé fè mes-makak gran-grek
Ou pé kouyon kon fonmi dekdek

Ou pé fè mannev pou trapé lajan
Ou pé fini pot-monnen an banbanm

Ou pé mété an kannari koké anlè difé
Ou pé nenyen an lavalas gwo-pwel

Ou pé lévé tet wo an syel la
Janmen ou pé ké pli wo ki dé zyé-w

Ou pé bésé ba an la tè-a
Janmen ou pé ké pli ba ki dé pié-w

Ou sé an nonm
Yen ki an nonm
Ou pa bondyé
Mé ou pa chyen-fè

Janmen ou pé ké osi wo ki sa ou ka kwè
Janmen ou pé ké pli ba ki ou menm, mon chè

Ou sé an nonm
Yen ki an nonm
Ou pa bondyé
Mé ou pa chyenfè
Yen ki an nonm

Nelly Martin
Novembre 2012