Potomitan

Site de promotion des cultures et des langues créoles
Annou voyé kreyòl douvan douvan

Moun a set soley

Max Diakok

Prix KALBAS LÒ 1

au concours

Kalbas 2008 - Prix Gilbert Gratiant

 

 

 

 

 

Kalbas 2008

 

Anba kawbé a syel a Bondyé
Ja vwè van vanté
Pyé koko kanté
Koko vet tonbé
Koko sek rété
Déotwa démélé
Onlo ka hélé
Tini ki ka kenbé
Tini ki kon bébé
Tini ki toupré janmbé
Tini ki tou pè tonbé
Tini ki ja ka
Tini ki té ka
Tini ki té ké ka

Tini moun ka fè set soley lévé
An wonn-la
Pas
Menmjan tini moun dékalbandé
Tini moun a kouraj byen bandé
Moun a kouraj byen bandé
Moun a kouraj byen bandé
Ayayayayay
An vérité an vérité
An savé la dévenn ka rivé an fizé
I ka viré apyé
On kè déchèpiyé ka vwè dèmen mal abiyé
Pa ka touvé koté pou i apiyé
Tini ki san bobo
Tini ki ababa
Alabébétoum
Adan on sel léloum
Tini ki ka kanni
Tini ki ka enni hanni
Tini ki ka fè flè
Tini ki ka flétri
Tini ki pé souri
Tini moun ka manjé nanm a-yo an salad
Tini moun vyé lidé pa ka rann-yo malad
An di-zot
Menmjan tini vi dékalbandé
Tini moun a lespwa byen bandé
Moun a lespwa byen bandé
Moun a lespwa
Zò tandé
Anba kawbé a syel a Bondyé
Tout pawol ni on wol
Fò-w sipé an plen vol
Pawol ka mété-w lékol
An ja tandé pawol san karé-sol
Pawol-foumi-fol ki pa dwol
Pawol palé
Pawol hélé
Pawol ka dépalé
Pawol san sè é frè
Pawol yo-yo-di yo-yo-fè
Pawol a moun ka vwè yenki lenmi asi latè
San vwè lenmi andidan kè
An ja tandé pawol hanté
Pawol chanté
Pawol-longan
Ka fè kè kontan
Pawol an tan lontan
Pawol pou toultan
Pawol pou dèmen
Pawol pou dé men lyanné
Mé an savé
An vérité
Menm jan tini moun a lidé dékalbandé
Tini moun ka fè lidé vansé alavandé
Ka fè bel lidé dansé alavandé
Ka fè touplen bel lidé dansé alavandé
Anba kawbé a syel a Bondyé
Tini moun ki la pou fè nou gouté
Siwo a on douvanjou matrité
Toujou kouté-yo
Kanté pou kouté
Pa bokanté boyo pou pay
Kouté kouté kè
Kouté kouté ka
Pa kité bel koté a lavi ped lakat
Kouté kouté
Kanté pou kouté ka-la wouklé
Kouté koutou-koutouk a tanbou-la
Sa pi rich ki yon tonbola
I ka pwotéjé-w jis an tonbo-la
Tini boula pou tout lenbé
Bel banboula pou lanbéli pé ri
Apré lapli
Adan vyé lagli
Adan bigidi a lavi
Sa sé mizik filawmonik
Pou krazé tout vyé kritik
Ka volé kon bann moustik mistik
Ka simé panik
Anhan
An pé répété sa
Jis an gel a réken
Pi gran lenmi an-nou sé nou menm
Pas an vérité
Menm si onlo biten dékalbandé
Bel lidé a konfyans pé dansé alavandé
Bel lidé a konsyans pé dansé alavandé
Bel lidé a lanmou san méfyans
Pé dansé alavandé
Asi zel a moun
Ka fè set soley lévé
Andidan kè.

Viré monté