Potomitan

Site de promotion des cultures et des langues créoles
Annou voyé kreyòl douvan douvan

KREYOLAD 667

Gwo moun

01.06.2017

Jid

Photo Francesca Palli

Lasimenn pasé sé té an jounen entènasional pou lité kont maladi ka rann moun gwo. Yo palé di «obésité». Sé an brital malkadi ka atatjé gran kon piti, avòté kon koklez. Mé pli danjéré-a sé manniè nou ka manjé jòdijou. Nou ka manjé tro sikré, kafé oben ji nou sé vizou toubannman. Té ni an lwa «Lurel» pou rann bwè-manjé mwen sikré mé ou sé di nou pa djè odtjipé di sa.

Kantapou sel-la pa menm palé, sa fè ki anlo moun pa ka djè fè atansion é yo ka fè tansion. Bagay ki pé fè anlo adan nou trapé konjésion. Menmsi jòdijou yo ka palé di AVC.

Adan zafè «obésité»-tala, gwo moun ka fè sa yo pé pou viv épi maladi-tala. Yo jik kréyé «Miss Ronde et si belle». Atjelman tout moun pa ka déplasé san loto yo, ki fè ki nou pa ka djè maché ankò. Tousa ka fè yo anlè kò yo é yo pa ka fè ispò.

Nou ka manjé anlo bagay ki sòti lotbò, é nou pa toujou sav ki manniè yo ka fè’y. Jan isi tibren krentif sa ka pousé isi épi zafè klordékòn-lan mé es yo ni garanti épi sa ka sòti dan dot péyi ?

Anlo ka alé bravman adan jaden klimatizé-a, mé akondi poveb-la «sé pa tout gwo boutèy losion ka santi bon».

Ou sé di nou ka ped tout mes manjé tinen-lanmori lé maten, mé nou ka genyen «Corn Flakes» konmen lajan pou prézonnen nou. Sa plen sik endistriyel ek podui chimik.

Manmay si nou lé konbat brital maladi-tala ka rann anlo moun gra épi épé, annou viré manjé manjé péyi-a.

Jid

* * *

crabe

Sommaire Kréyolad

 Viré monté