Kannaval-la poko pati mé ou sé di do Nal ni tronp. Ou sé di i ni anlo dèyè do’y, menmsi misié pa an léfan.

Adjilbè di mwen, i wè an télé-a an répétision enstalasion nouvo prézidan Lamérik la. Té ké ni anlo bagay an do misié sé bien pou sa yo mété konmen polisié pou véyé tout bagay. Pa menm perch selfi ou ni dwa ni.

Antouléka, nouvo prézidan-an ni bon bagay an do’y:

— Fanm ké défilé sanmdi pou yo potesté kont li!

— Méritjen ki voté kont-li ni lentansion défilé pou di yo pa dakò!

— Sa ki voté ba Man Clinton pa ka ri pies toubannman!

— Anlo prézidan dot péyi pé ké menm vini, kontel Fanswa alé o Land an koté ou pé bwè ti-fé’w an gou’w.

Anfen anlo moun pa kontan kontel sé moun an ki enmen manjé viann-lan. Labatwa an grev é sé poul éti ou pé tjwé bò kay ou selman ou pé manjé.

Ni an méritjen isi-a ki anrajé kon an tig, pas misié ki té kont Ilari, pé pa envité kanmarad-li pou an griyad viann i té ni lentansion fè sanmdi aprémidi. Misié té fè lafet épi anlot konpè’y i té di’y:

— I la, ri plen boudenw atjelman!

Antouléka padan méritjen ka enstalé prézidan yo, anlo moun lagoch ka éséyé plen dé ti-bret lin. Yo ka mandé an léro selman, mé manniè moun rafen sé jou-tala ou sé di pa djè ni moun ké déplasé pou éli sosialis la ké alé kont Fiyon. Ni lontan misié ja trapé filon’y douvan douvan.

Man pa lé ba pèsonn konsèy, pas asiparé Misié mò Senpiè, mé sel bagay man ka di zot sanmdi:

— Pa tronpé kò zot!

Akondi pawol-la «ou sav sa ou ka pèdi ou pa sèten sa ou ké genyen!».

Jid

* * *

Sommaire Kréyolad

 Viré monté