Jédi pasé a twazè’d laprémidi, ou té pé woulé alawoulib oben alez kon Blez afos lawout-la té obidjoul.

Loto ki té asou lawout, té ka woulé vitman pou alé chaché la an télé té yé pou gadé match démi-final Lafrans kont Lalmay. Jou-tala, man wè ek tann anlo bagay kontel:

Man wè an boug ki touléjou, pa lé pousé chario lè madanm li ka alé an libsèvis, i mennen madanm a midi pou fè kous. I té asiré manzel té ni dé zè douvan’y pou sa pran tout ti tan’y.

Man tann dé kalté bagay kontel, ni an vwazin ki di mwen:

 — Man zèn pas man vréyé an zen an goj sé Alman-an, é i asiré yo ké ped.

Mé pli bel-la oben pli red-la (sé zot ka wè) ni an gran-nonm ki alé fè kous vitman, I achté tout ti-zagré’y (an boutèy wonm, dé pak labiè, laglas épi kisasayésa). Lè misié wouvè lapot-la, i pa té lé kwè sa ziè’y té ka wè a. An latélé gran ékran i té fini genyen, ni an moun  ki rann li an sèvis, i déplasé’y. Boug-la té anrajé kon an kong, konjésion mantjé pran’y.

Ni anlot ki ni toupé pasé an réjim fig, I anni antré an salon an moun ki pa té la. Lè met kay-la mandé’y sa i ka fè la, i réponn karektèman:

— Man vini wè ki manniè Lalmay ka ped jòdi a!

Sa ki pli éfréyan, sé ki met-kay la mandé madanm-li alé chaché an labiè alman ba misié. Mé fanm-lan pa asepté sa dou kon siro, i mété an bagay an pij an fon vè-a pou misié alé lib anlè latjé’y. Man kwè i pa menm ni tan wè bi lafen premié mitan-an.

Sé ki léro-foutbol la ka fè moun fè dé kalté bagay. Sé bien pou sa gouvelman pofité fè an lwa pofitasion pasé an sitjet ek an bèn. Sé dépité-a ki té lé wè match la, yo mèch. Pa té ni yonn an parlèman-an.

Antouléka, Eliz (vwazin mwen) kom ri sa, pas fout foudtbol ka fè moun di bétiz. Man jik tann di an boug valé an bol diri san triyé tou kri, ek kasé bol-la lè Lafrans matjé déziem bi-a.

Man ka mandé mwen si man pa adan tou.

Jid

* * *

Sommaire Kréyolad

 Viré monté