Lasimenn pasé, l’AVCA fè moun pabliyéja ni dizan sanswasantdé moun disparet flap pabò Vénézwel abò an avion poubel. Jik jòdi yo pa ni bon répons, magré asosiasion ka bat kon chat meg an zabokavet pou rivé sav sa ki pasé.

An sikolog di sé moun an ki ped fanmiy yo-a adan akisdan-an, pa  djè atann asou lajistis pas chagren yo péké bout.

Sa té red pou sé moun an ki té la-a, mé es yo ké pé trapé  répons asou an avion poubel?

Yonndé militan monté Robè pou chonjé Prézidan Capgras, mé pa té djè ni anlomoun.

Adan zafè atann-an, Brino-Nestò pa tjansé pou fè an estati ba Clarisia pou moun pa bliyé’y.Mé misié fè an kout visié, I mizé asou an répons anlo moun ka atann.

Atann ki sa?

Atann i pran pozision asou dé kok ka goumen jik o dèniésan, é yo ka filé zépon yo. Man jik tann yonn adan yo di zépon’y bien filé é i pa o bouchon.

Antouléka misié poko lé di asou kiles milé oben chouval i ké mizé. I té préféré gadé kous anlè plaj la, kon chak lanné.

Tout sé parti politik la té la épi nonm di fil yo oben moun ka reprézanté yo. Ni yonn ki té jik malad (palé pa nonmen non moun). Pres yo tout palé mé Clarisia té ka gadé yo, ek i lévé dé lanmen’y an siel pou di i lé lapé.

Es sé jou prochen-an ké ni lapé ant sé boug politik-la, lè nou sav ni tousa kouba,krochpat, épi lapofig yo simen toupatou, lè sé pas zenzen.

Ni anlo ki di péké ni pasé lanmen pas fok sa chanjé. Tout bagay la sé sav es nou vréman anvi an chanjman?

Si zot sav fè di mwen!

Jid

Sommaire Kréyolad

 Viré monté