Sé jou-tala Maéva vini an vakans kay Papa-Doudou. I ka kriyé Papa-Doudou Papy, misié pa djè enmen sa pies pies pies. Mé kom sé ti-yich ti-yich li i ka asepté.

Sanmdi pasé, Papa-Doudou vréyé Maéva an boutik man Léoni a pou’y té genyen an mis luil ba’y.

Maéva di Papa-Doudou:

– Papy je t’ai déjà dit ce n’et pas une boutique mais une épicerie!

Papa-Doudou pa di tianmay la ayen mé man santi i pa té kontan. I ri ba’y.Atatay si i té sav. An tan-mwen man pa té ké janmen di Papa-Doudou sa. Asiré man té ké trapé an souflé.

Maéva viré di Papa-Doudou :

– Qu’est-ce que c’est que cet histoire de miss, ce n’est pas un défilé Papy!

Sé ki ti-manzel la pa sav ki Papa-Doudou toujou rété épi mizi ansien i konnet. Jik atjtelman i ka palé an ansien fran. E jik alé sa i konnet kom mizi sé : mis, rotji, chopin ek lit.

Sé konsa lè twa jénérasion ka jwenn yonn pa ka konprann lot.

Délè menm ich ou pa ka konprann lè ou ka palé oben lè yo ka palé.

Lot jou ti-bolonm mwen an di mwen man té ka mété patalon pété boul. Lè man mandé’y lesplikasion i di mwen sé pas man ka fè pantalon mwen monté tro wo. Misié ka pòté pantalon’y anba bonda’y. Kidonk i pa o konba, pas ren’y pa maré. Mé saw lé  fè sé lajénes.
 
Maéva konnet Miss France, mé pa mis luil. Kréyol la ka foukan, Fransé a pran laba sirtou épi sé tianmay la ki laba a. Papa-Doudou é mwen menm tou tris pas kréyol la kon an servolan ka marot.

Jid

Sommaire Kréyolad

 Viré monté