Kan mo relir to zistwar mo dekouver ki to enn gran kado pou to pei.
Depi tipti tonn dekouver ki a traver langazman o servis lezot, to pou kapav donn enn sans to lavi.
To inn grandi avek dan to leker lamour pou to prosin.
Touzour tonn viv an armoni avek to bann vwasin.

Antoinette kifer to finn kit nou boner koumsa?
Nou ti ankor enan bokou pou aprann de twa.
Zanfan Rodrig pou touzour rapel twa,
Parski pou zot to ti kouman enn manman.

To pa ti kontan pouvwar e to pa inn rod grander,
To inn viv dan simplisite e to inn ed boukou dekouver zot boner.
Touzour to inn soutenir bann fami,
To ti enn gran konseye pou to bann zami.

Lintere to pei ti pass avan tou lezot lintere,
Pou li grandi tonn voyaze pou al partaz nou simplisite.
Kompetans ki tonn akerir to pann inn gard li to inn partaze,
Tonn touzour donn lezot loportinite pou debriye.

Pandan tou to lavi to ti enn fam zwaye,
Parski to ti konin bizin afront difikilte san dekouraze.
To lavi Antoinette li enn zoli mesaz pou nou tou Rodrigue,
Nou bizin enn pep solider e pran nou responsabilite.

Nou pa kapav dir ki nou krwar dan Zezi Kri,
Si nou pa viv dan la verite e rann enn temwaniaz Levanzil par nou lavi.
Antoinette to nom ek to mesaz pou res grave dan listwar,
Parski avek enn gran lideal tonn gagn kouraz pou krwar.

Aster mo konpran kifer nou dir,
Ki bann premie fri ki tombe se bann seki inn mir.
Difon mo leker mo dir twa mersi,
E mo swete ki lavi sak Rodrigue resanble to prop lavi.

Jean Rex Casimir
Le 5 Septam 2011

Antoinette Prudence

 Viré monté