Potomitan

Site de promotion des cultures et des langues créoles
Annou voyé kreyòl douvan douvan

Langaz Kreol

Jean Rex Casimir

 

Depi avan mem ki nou vinn lor later,
Samem langaz nou enan dan nou leker.
Dan sa langaz nou paran ti koz ek nou zantiman,
Avek samem langaz nou exprim nou bann santiman .

Nou finn ne dan enn lanvironnman kot koz kreol,
E nou bien kontan ki nou langaz pe rant dan lekol.
Samem langaz ki permet nou viv linite dan diversite,
San kreol nou penan okenn lidantite.

San nou langaz kreol ki nou ete,
San nou langaz maternel kot nou pou ale.
Biento lekol, apre sa biro ek dan lavenir parlman,
Kifer enan pa dakor ki nou langaz touzour bizin met li delavan.

Nou langaz se enn trezor ki bizin valorize,
Zanfan nou pei merit ki nou respekte zot dignite.
Tou dimounn bizin merit gagn mem loportinite,
Zordi anfi bann barier pe komans tonbe.

Angle aprann an angle, Franse aprann an franse,
Zis nou tousel nou pa aksepte sa laverite.
Zanfan nou pei ousi merit enn meyer tretman,
Kan pa ou lavenir ki dan zwe, fasil ou vini avek tout sort largiman.

Pei larkansiel kifer lor to later enan otan divizion ?
Touletan bann egois rod fer aksepte zot lopinion san okenn konsiltasion.
Zanfan lakot, lavil ek dan vilaz dir les nou langaz al pli lao,
Parski nou tou nou merit mem par gato.

boule

 Viré monté