Potomitan

Site de promotion des cultures et des langues créoles
Annou voyé kreyòl douvan douvan

Lè mwen ka vwè-w !

Ernest Pépin

Lè mwen ka vwè-w
La vi ka monté an syel
Pou ba zétwal manjé
É fè lan nuit chanté

Lè mwen ka vwè-w
La vi ka chayé mwen
adan on bel botan
soley ka lévé mwen
pou kléré tout lanmou
kô an nou pé poté

pwason volan ka trikoté lanmè
tout pyé banbou ka rantré an pryè
mirak toulong alé ka ouvè chimen-aw
padavwa ou sé ti moun a bondyé

La vi pé pa monté pli ho
Ki la belté aw pand
La vi pé pa simé plis bonté
ki sa ou ka simé touléjou

Dlo pa ka monté mon
Mé lanmou ka monté mon
é mi lapli si tol ka chofé on dousine
é mi lalinn ka bo têt a lannuit
é mi lanmou ka vlopé tout limyè
mi vou
mi mwen
mi nou
konsidiré la tè jani kont a moun ay

lè mwen ka vwè-w
la vi ka dépalé
kon zozio an ba bwa
kon siklon ozabwa
kon tanbou an rou lib

an pa sav ki kont ou ka rakonté mwen
an pa sav ki bles ou ka  guéri ban mwen
an sav on simen ni 7 jou
on lanné ni 12 mwa
mé tousa pa sa
pas sé-w ki kalandrié an mwen
sé révé  lavi ka révé adan dé zié an nou

lè mwen ka vwè-w
montagn ka ni zel
é sé difé tousel
ki pé di sa nou yé

Viré monté