Le combat des rats et des belettes

Kan mem sèpan pa résanblé sat,
Mé tou lé dé i hayi lé ra. Ou a di Bondié
Ti fè le ra pou zot manzé. Tou sa la mové bébet.
Sat, lé ra, sèpan, mwa pa konné ak fè zot lò la tè.
Piski Bondié fè zot, fodré kwa ti nésésè.
Bondié i kòn bien sa ki li fè.
Aprézan mwa rakont zot enn zafè ki ti pasé lontan,
Antr lé ra ek sèpan. Lé ra ti oulé la gè.
Alors zot komans fè péparatif tout koté,
Zot rasanblé; zot swazi sézan, zofisié, sef, zot ekzèsé.
Lè zot ti fin bien ekzèsé, zot ti kwa zot for .
Zot tou zot sòti déhò pou al atak bann sèpan.
Zot zwé en pti ler d’mars, tou zafè.
Mé lè zot fin ariv divan bann sèpan,
La ki ti ana zafè! Zofisié lé ra i komans dmann di lo di sik.
Magré tou, kan mem,
Zot tranblé la lè, zot komans la gè.
Mé lè zot wa gren di plon i tonm koma la pli,
Zot tou zot anvi tayé. Lè zafè i aprè sofé,
Zot tou zot sové . Zot tou zot di: «Avan nou mò,
Bondié, sov movè lé kò.»
Solda, zofisié, tou doumoun i tayé aprézan.
Solda i antré dan tou pti trou, dan tou la fant ki zot trouvé.
Bann sef, zot, ti fin met en nespes plimé pou distengé.
Lè zot oulé antré dan trou, pa fouti; plimé la i zèn zot.
Sa fè, zot oblizé resté déhò. Sèpan i tonm lò zot, i touy zot an mas .
Enn, pa ti zapé.

[Maziné ki masak sèpan ti fè ek zot!
Koma di ou zet pti mil dan poulayé
Ek poul ki abitié manz di ri.
Zizé pu mem ki déga!]