En zou ti ana enn lion, enn fémel mouton, enn fémel kabri épi en jénis
Zot kat i di ansanm: «Annou asosié,
Pou nou al la sas ansanm.» Zot tout fin tonb dakor.
L’er bar-d’zou i fer, zot lévé, zot bwar kafé; la zot al dan bwa.
Mo kwa sa zou la, zot ti fin gangn la gign.
Zot mat la a dwat, a gos, patou patou,
Pa fisi gangn en nayen di tou… Afos a fos,
Fémel mouton i may en gwo mal serf dan son la:
La, i kriy lé zot: «Vin dòn-mwa la men!»
En pti moman, zot tout fin arivé. Konpè Lion i di zot:
«Bon! A prézan fodré partazé, sa.» I ti son gran kouto,
I koup sa bébet la an kat, pou sakin gangn en kartié.
(Mwa mo kwa kom sa.) Aprézan konpè Lion i di:
«Ki s’enn la ki zot met isi?» Zot di li; «Ou mem;
Nou pa na lot met.» I di: «-Eben, kan servitè i ana kek soz,
Fodré donn zot met isi?» Zot di li «Ou mem;
Aprè sa, i di: «Ki s’enn la ki ana pli gwo lé dan?» - «Ou mem.»
«A ben, piski mon lé dan i pli gwo, fodré ki li gangn en mòso.»
Aprè sa, i di; «Antré nou kat, ki s’enn la ki pli for?» Zot di li:
«Konpè, nou kwa ou mèm ki pli for.» - An ! Zot kwa ? A ben,
Zot pa dwa fer mwa di tor. Si mo pli for, fodré pey la fos osi.
Mo pran enn kartié pou mon la fos.» Jans-la i vin bet !
Aprézan, Lion i di: «Zot, akout mwa bien: Mwa pa kontan rod rod dispit.
Si enn, entré zot, i ana malè met la men lò sa mòso ki resté la,
I kapab konté, azordi son dènié zou»… La, i pran tou lé kat mòso.
I met dan son pakatia, i di zot : Adié… I al dan son la kour…
Jans-la pa fisi di en mo!

Sa ki ana malè pran zasosié,
I pran roten pou fwet son lé kor.
Sa, tout doumoun i konné, sa.