Kann, kann, kann,
ou dou kon vizou,
ou jwé kokangn.
Djòl mwen bokanté gou.
Somach, ou fè mwen rann.
San’w kanni klè kon dlo
paré pou anni fouté an dalo
nèg madjandjan
fyankan, soufran.

Sik sé sik.
Wom béni wonm.

Koulè swèf ou wouj kon fonmi.
Agoulou ou sousé djouk a vonmi.
Batiman sou lanm. 
Van chayé Latjoupanm kon sann.
Dyanman flanban dédyèldésann.

TAN VAN BLAN LADJOUKANN PRAN NANM DJOUKMANN
AN KOUTJANM, AN PYÈSKANN, AN BAGN.
CHAGRINMAN, LAGONISMAN
KANGN, PYANMPYANM
AN BANBANM
TOUDISMAN...
SAN LAKONTANTMAN
SAN PWOTEJMAN
SAN PLEDMAN
SAN ARANJMAN
SAN SANTIMAN
SAN BIYE LANTÈMAN.
Loséyan lam.
Vonmisman lam.

Kann,
madigwàn soukliyan  titàn,
katrinpidjan  adan gran ganm agasan
pran dan lyann,malérézman,
radkabann-bélévan

Zam, zam,zam!!!
Aladéviran,
soubawou bwa mitan fannkann an blipann.
Lanmann:
Ou sispann’l an makokàn kon offrann pou fèy tann.
An fèman fann gadjanm.
San, san, san an savann, san manman

Kann fanfann nanm tibann.
Chaspangn toloman,
Sèvolan foukan.
Tibann fyankan:
Djenndan san dan

Méchan
kann-jenjanm blan,
dyòl-papalam
fòsan
ant flanng donan
dépann fanm-ladjoukann.
Lerestan:
An  nésans chayman dimi-blan

Kann, kann, kann
aprann nèg-zanbitan
“Ajisman titiri san paran”,
kon kanman.

Kann, kann, kann,
nanninannan vayan,
atjòlman asou kan.

Chan lankan malfézan,
atjòlman Zanfan -gangan
an touman.

Kann, kann, kann,
van léspéransman
an finisman...