Bayalé

Sé an lanné 1989 Patrick Chamoiseau, Jean Bernabé é mwen menm, nou mété déwò an liv yo ka kriyé Eloge de la Créolité¹ é sé di la, davwa liv-lasa trapé onpil siksé tout owon latè, ki moun komansé palé é diskité asi konsep a lakréyolité. 14 lanné apré, koté nou rivé épi sa? Ki kalité bilan nou pé tiré di vréyé-douvan a lidé-lasa?

Dabò pou yonn, an kwè fo nou fè on distenksion ant réyalité antwopolojik a lakréyolité é mouvman kiltirel é politik la ki Chamoiseau, Bernabé é mwen nou désidé kréyé la. Lakéyolité sé on biten ki vié kon nésans a lé Zantiy é la Guiyàn, sé on biten ka komansé dépi prèmié kolon fwansé é prèmié esklav afriken met pié a yo asi sé zil-la é sé tè-la ki Karayib, pep karayib-la, té ka okipé la kon H. Petit-Jean-Roger ka espliké’y². Kivédi lakréyolité pa on biten ki nef, ki paret lot jou-la kon sèten moun ka kwè. Lakréyolité paret adan doukou a lakolonizasion é a lestravay, i kontinié viv é débat kò a’y apré labolision a lestravay é, jod-la, i la toujou magré ni anpil danjé ki ka pézé asi tet a’y.

Ki sa lakréyolité té tini dè espésial pa rapot a etsétéra fénomèn kolonizazion ki fet adan istwa a limanité siek épi siek avan 17è siek-la?

Kon nou sav Women anvahi la Gol, Arab anvahi l’Espay, Mongol anvahi la Chin kisasayésa…Pep pa jen sispann anvahi dot pep dépi nonm ka viv asi latè. Enben, dapré sa nou ka espliké adan Eloge de la Créolité, ka apiyé démonstasion an nou asi yonn-dé lidé ki Edouard Glissant³ té ja met déwò, sé ki pou prèmié fwa adan istwa a limanité, o Zantiy, pres tout pep, pres tout kilti asi latè té blijé viv ansanm, kolé-kolé, adan dé téritwa ki té piti kontel Matinik oben la Réyinion oben ki pa té tini onlo moun adan yo kontel la Guiyàn.

Sé prèmié fwa biten-lasa fet adan istwa a limanité! Lakréyolité sé prèmié mondializasion ki fet, prèmié globalizasion kon sé Anglo-Sakson la pisimié di. A nivo ras, Amérendien, Blan, Neg, Zendien, Chinwa, Arab kisasayésa…touvé yo ka viv yonn bò lot, yonn èvè lot, é yo miganné pou fè Milat, Chaben, kapres, chapé-kouli, bata-chinwa, bata-siriyen, biten ki pa té jen fet avan 17è siek. A nivo rèlijion Jézi-Kri, Ogoun-Féray, Nagourmira é Allah touvé yo sanblé adan on sel koté, on sel piti koté, biten ki pa té jen fet avan. E pou mizik, pou kuizin, pou architekti, pou tout biten nonm ka fè, tou sa enki miganné an jan ki enprévizib. Pi bel ekzanp kréyolizasion-la, sé évidaman lang kréyol an nou la ki ka pèmet nou sanblé ek bokanté pawol jod-la. Kon zot sav, kréyol a pa on kréyasion a Neg tou sel: Amérendien karayib pòté grenn sel a yo adan’y, sé kolon fwansé la èvè dialek nowman, vandéyen, pikaw a yo pòté grenn sel a yo é, titak pi ta, Zendien, Chinwa é Siriyen vin miganné lang a yo adan kannari, adan kalalou a lang kréyol la osi.

Ki jan lakréyolité vin rèjèté

Mé migannaj-lasa pa fet adan lérezté, i pa té on bokantaj ant moun é pep ki té égal-égo. I fet ant on pep ki té ka dominé, sé kolon fwansé la, é dot pep ki té anba jouk a yo kivédi Karayib, Neg, Zendien, Chinwa é Siriyen. Kivédi si La kréyolité istorik sé on bel biten, sé on biten ki nef, ki fò, adan menm balan-la, fo nou rèkonet kè i ka chayé tout vié mak, tout estigmat, a dépotjolaj sé Amérendien-la, lestravay a sé Neg-la é joukaj a sé Zendien-la é sé Chinwa-la. Sé dayè pou sa, pannan pliziè siek, pon moun pa vwè bon koté a fémomen lakréyolité-la. An ka fè on ti parantez pou di ki pa ni pon dékontwolaj, pon kontradiksion, ant kréyolit» é «kréyolizasion», menm jan, kon Jean Bernabé ka fè woumaké, pa ni pon dékontwolaj ant «limanité» é «limanizasio». Yonn, «limanizasion» ouben «lakréyolizasion» sé prosésis-la, prosésis istorik le, lot-la, «limanité» ouben «lakréyolité» sé jan moun ka viv prosésis-lasa adan sé diféran lépok-la, sé fonn-kè, sé santiman sé pep-la pa rapot a sa yo ka viv la adan dives moman a istwa a yo.

Kidonk, pou déviré asi sa an té ka di la, lakréyolité ka pòté vié mak a lestravay asi po a’y é pon yonn adan sé pep an nou la pa jen té vlé woukonet vré valè a’y. Sé Béké prèmié ki fou’y an hazié⁴. Sé yo prèmié ki déklaré kè kréyol a pa on lang, kè kréyol sé on jagon a Neg ouben on patwa. Apré sé Milat, konmva yo té vlé sé Béké-la asepté yo, ki kalé gel a yo asi lang é kilti kréyol la é ki opozé timoun a yo palé kréyol. Apré, lè 20è siek-la rivé, sé Neg épi, pi ta, Zendien, Chinwa é Arab ki tiré méprizasion ba kilti an nou. Pouki? Sé davwa lakréyolité toujou viv, toujou dévlopé anba jouk a on kilti dominan ki sé kilti fwansé la oben kilti anglé la adan dé péyi kon Dominik, Sent-Lisi, Moris ouben Séchel.

Lakréyolité pa jen rivé trapé on ti espas, on ti wouspel pou i té sa viv viv a’y on jan ki lib, menm adan on péyi kon Ayiti ki trapé endépandans a’y bonnè pis i kaskod èvè la Fwans an 1804.

Sé ki lé metjwas ayisien, sé élit ayisien-la si zot simié, té blijé asepté dominasion a sé péyi l’Ewop la é ta lé Zéta-Zini. Tout sé mové kondision-lasa pa rivé opozé lang é kilti kréyol la dévlopé yo an mizi an mizi, pannan apochan 3 siek. Pep an nou réyisi met doubout on majolay, on oraliti ki mapipi, ki vayan, on oraliti ki rich èvè kont, titim, sirandàn, chanté, pwoveb kisasayésa…Mizik kréyol-la rivé pwan bon balan é enpozé’y toupannan i té ka gloubap, i té ka dijéré sé apò éwopéyen la. Rèlijion an nou, Vodou an Ayiti, Endouizm la Réinion oben Gwadloup, magré légliz katolik té ka fou yo bon tap, rivé rézisté é kontinié fè viv adan kè an nou sé ansien bondié l’Afrik é l’End la.

Sa ki pòtalan pou rèmaké sé kè rézistans-lasa pa té ka woulé on jan ki fèmé mé okontrè on jan ki ouvè: kivédi, an mizi an mizi, lanné apré lanné, siek apré siek, kuizin an nou, mizik an nou, architekti an nou, rimed kréyol an nou, lang an nou té ka adopté é té ka kréyolizé dé biten étranjé san ki yo té ped nanm a yo. Sé nou prèmié asou latè ki envanté sa nou kriyé adan Eloge « idantité miltip ». Jod-la, tout moun, o Zéta-Zini é an Ewop, ka palé dè sa, ka réfléchi asi sa, ka maké liv asi sa mé nou, moun la Karayik é moun Loséan Endien, sa ka fè plis ki 3 siek nou ka bengné adan sa, ki personnalité an nou machoké, fòmé adan soup-kalalou lasa. Poblem-la kon an ja di’y, sé kè sistem-la té ka opozé nou vwè valè a idantité miltip-lasa, i té ka enpozé nou on sel lidantité, ta l’Ewop, ka blijé nou rèjété lang é kilti kréyol an nou. Mi kon sa lakréyoliyté istorik fet.

Mouvman lakréyolité sé lanné 80-90 la

Kidonk an té ka di zot, an komansman a plodari an mwen, ki fo pa nou konfonn lakréyolité istorik èvè Mouvman a lakréyolité ki paret adan finisman a sé lanné 80 siek-la ki fin pasé la. Pouki? Davwè mouvman-la ki Chamoiseau, Bernabé é mwen, nou voyé douvan-la, sé on réfleksion téorik asi lakréyolité istorik, sé on jan pou wouba’y on dot larel-dwet, on dot perspektiv si zot pisimié, é soutou pou woté sé vié mak la i tini asi po a’y la é pou valorizé sé bon biten-la i pòté la. Mé pèmet mwen onfwamenm fè zot rimaké on biten ki onlo moun ka bliyé: sé ki lakréyolité téorik pa paret èvè liv an fwansé a Chamoiseau, Confiant é Bernabé. Awa! Lakréyolité paret 10 lanné avan sa, adan liv ki Sony Rupaire⁵, Hector Poullet⁶, Monchoachi⁷, Elie Stephenson⁸, mwen menm⁹ kisasayésa…, liv poézi an kréyol, pies téyat an kréyol, woman menm an kréyol. Lè ou gadé, on ranboulzay, on révolision fet adan sé lanné-lasa: kréyol sòti adan lékriti doudouis¹⁰ pou i antré adan lékriti natif-natal. Kréyol antré adan goumé politik, adan goumé sendikal, adan jounal é radio, adan linivèsité é lékol.

Sé an 1973, ki adan Sant Inivèsitè Fouyol ki Jean Bernabé met prèmié montray asi lang kréyol é sé an 1978 ki Hector Poullet kréyé on rèvi, Mouchach, ki té soutitré «Bulletin de la Créolité». Nou té prèmié makè é prèmié gran-grek ki ba lang kréyol la tout valè a’y, menm si avan nou té ni yonn-dé gran zanset kon Alfred Parépou, Guiyanè-a, ki, an 1885, pibliyé prèmié woman an kréyol, Atipa. Menm si adan sé lanné 40-50 la, on Akadémi Kréyol vwè jou an Gwadloup èvè dé moun kon Rémy Nainsouta, Bettino Lara é Gilbert de Chambertrand. Menm si, an bout a sé lanné 50 la é an komansman a sé lanné 60 la, dé Manitinken kon Gilbert Gratiant é Georges Mauvois pibliyé dé teks kréyol ki té fò toubolman. Tout sé makè-lasa té konpwann avan nou valè a lakréyolité é délè, yo jis maké yonn-dé biten asi sa¹¹, mé yo pa rivé fè ki lidé-lasa enpozé’y adan sosiété-la davwè lespri doudouis la é asimilasionis la té two fò.

Jénérasion an mwen, ta Rupaire, Poullet, Monchoachi, Joby Bernabé, bénéfisié dè on doukou, on konjonkti istorik espésial: mouvman a dékolonizasion sé pep l’Azi ek l’Afrik la ki fet an komansman a sé lanné 60-la. Tout pep asi latè té ka pwan konsians dè idantité a yo é yo té ka kaskod, yonn dèyè lot, èvè sé gran métwopol kolonialis la. Jis ni dé Antiyè kon Frantz Fanon, Roland Thésauros ouben Daniel Boukman ki partisipé adan sé konba-tala. Sa vré ki o Zantiy, an Guiyàn é la Réinion, olié nou té baké adan menm larel dékolonizasion-lasa, nou anchouké nou plis ankò adan bra a la Fwans. Sa vré ki lwa asimilasion 1946 fè nou kilé pi dèyè ankò, mé andidan pep an nou, té ni dé sèten moun, dé makè, dé gran-grek, dé moun pep-la ki té ka défann kréyol, gwo-ka, bèlè, kuizin kréyol la kivédi tradision an nou.

Kidonk sé tout goumé-lasa sé moun-tala menné la adan sé lanné 70-la ki pèmet lakréyolité frankopal, tala Chamoiseau ka senbolizé la, vwè jou. Sé on biten pou nou pa jen bliyé! Es sa vlé di kè tini kek dékontwolaj ant lakréyolité an kréyol sé lanné 70-la é lakréyolité an fwansé a finisman sé lanné 80-la? Awa! Okontrè, adan lespri a Chamoiseau, Bernabé é mwen menm, lakréyolité frankopal la té an zouti pou voyé pi douvan ankò lang é kilti kréyol la é soutou on jan pou montré ki, parapot a fénomèn mondializasion-la, ki pep an nou té pi douvan pasé pon dot pep asi latè davwa sé on biten nou ja ka viv andidan’y dépi 3 siek. Lakréyolité kréyolopal, ta sé lanné 70-la té on biten ki té nésésè, ki té endispansab, davwa yo té kraché twop asi lang é kilti kréyol la. Menm jan lanégritid té nésésè, nan prèmié mwatié a 20è siek-la, davwa yo té kraché twop asi lapo nwè la é ras neg la. Mé sé on biten ki falé té dépasé davwa limanité té komansé ka viv adan zafè mondializasion-la. Nou ki té envanté on prèmié model a mondializasion, ki jan nou té ké pé fèmé nou asi lonbrik an nou, ki jan nou té pé fè wol pa vwè déziem mondializasion-lasa? Okontrè, davwa nou té ja ni ekspérians a mondializasion, sé nou, sé pep kréyol la ki té kapab, plis ki pon dot pep, kléré sa ki dèyè fénomèn-lasa, espliké'y’, montré valè a'y’é danjé a'y osi. Si nou té rété fèmé asi enki défans a lang é kilti kréyol la, nou té ké enki imité atitid l’Ewop té ni dépi siek épi siek, on atitid fèmé, choven, on atitid ki jistèman an dékontwolaj total èvè ki prèmié mondializasion-la ki fet a kaz an nou la an 17è siek-la, ki déziem mondializasion-la ki té ka woulé asou tout latè an 20è siek-la. Falé sé nou prèmié ki té mété déwò fondas a mondializasion 20è siek-la gras a ekspérians istorik la kè mondializasion 17è siek-la té ka ban nou la.

Sé pouki nou sòti adan on défans rijid, fèmen di lang é kilti kréyol la pou nou pasé a on défans dè tout lang ki mènasé asi latè. Sé pouki nou désidé kréyolizé fwansé la, fè’y vin on biten ki tan nou, ki kapab esprimé nam an nou, réyalité an nou. Sé pou sa, an lespri an nou, menm si fwansé té chaché dérayé kréyol pannan 3 siek, falé pa nou té chaché fè menm biten-la kivédi chaché siprimé fwansé-la adan péyi an nou. Okontrè, sé an riches lè ou vwè on pep tini dé, twa, kat, senk lang, ében, konmva, nou Kréyol, nou té tini dé lang, kréyol épi fwansé, ouben kréyol, épi anglé, ében falé nou té pòté mannev pou ilistré é défann sé dé lang-lasa, sé dé kilti-lasa. Ni yonn-dé militan a kréyol ki pa konpwann pozision an nou, ki akizé nou konmkwa nou bat dèyè, nou sé on bann tret. Yo pa konpwann hak oben sé nou ki esprimé nou mal, sé nou ki espliké pozision an nou mal. Janmen lidé an nou a pa té dè lagé kréyol é baké adan fwansé. Janmen pa! Nenpot observatè sérié pé vwè ki nou kontinié bat adan menm larel a défans é ilistrasion a lang é kiltirel kréyol é ki dot makè, dot gran-grek paret, ki woupwan chaltouné-la kon Roger Valy, Max Rippon, Térez Léotin, Georges-Henri Léotin kisasayésa…

Nou menm, nou désidé bat adan dé domèn: Chamoiseau chawzi ta siléma-la, Bernabé èvè mwen, nou chwézi ta linivèsité-la. Zot dwet wè dé flim kon «Béhanzin» oben «Nord-Plage», ki fini sòti. Sé menm larel a lakréyolité-la ki la. E man pa bizwen palé zot di tout travay nou fè pou konstwi an pédagoji kréyol ba étidian ki ka préparé KAPES kréyol la: an mwens ki dé lanné, nou pibliyé 11 Gid KAPES kréyol ek dot kalité liv pou ba lanseyman kréyol on fondas ki djok. Adan menm ta-la, Bannzil Kréyol Matinik é dot asosiyasion Gwadloup é Guiyàn té ka kontinié fè chak lanné an dikté kréyol é fété, chak 28 oktob, Jouné Entènasional a Kréyol. Sa pa vré ki nou sispann lit-la: i bokanté figi sé tout davwa adan chak étap istorik, tini dé nésésité ki ou pé pa fè lasanblan ou pa ka pèsèvwa. Si ou kité yo asi koté, a an moman ouben a an lot, yo andwa viré pongné’w pa kolé, biten ki ka rann sé éfò-la pi red ankò.

Pou bout plodari an mwen la, ki bilan nou pé tiré di 30 lanné lakréyolité, ki an kréyol ki an fwansé? Es nou réyisi sa nou té vlé fè la? Es nou bité asou on woch é nou ankayé bato-la? Ni yonn ni lot. Goumé-la ka kontinié. Nou fè onlo biten, nou rivé ba kréyol-la on plas i pa té jen ni an 3 siek ekzistans mé, an menm tan-la, présion fransizasion-la é asimilasion-la pézé pi lou ankò asi tet an nou é i fè onlo déga adan lespri an nou. Nou ka vwè ki sé jenn jénérasion-la pa tini kréyol ankò kon lang-nennenn. Kréyol-la vin déziem, apré fwansé-a palakoz lékol, latélévizion, vréyaj an Fwans ki pi fasil, prézans adan péyi an nou di on paket moun la Fwans kisasayésa…Sel biten an pé di pou bout palé an mwen sé ki nou sé dènié jénérasion ki kapab sové lang é kilti kréyol la. Dènié-la Si zot vwè nou pa ba fes an nou twa tap pou pòté konba-la pi ho, pi lwen, pi fò, ében, asiré pa pétet lang é kilti an nou ké suiv menm chimen-la ki i suiv la Lwiziàn, Grinad, Trinidad é Bénézwel: i ké rantré an lagonni. I ké suiv menm chimen-la ki Sent-Lisi é Dominik: i ké vin on lapo lang, on zékal lang ki enki viékò é moun fondok lakanpay ké kontinié palé.

Mé, sa pa vré, an pé pa bout kominikasion an mwen la san an di dé mo kat pawol asi on évènman nou fété tout lanné-lasa Matinik, é ki zot ké fété lanné pwochenn Gwadloup: an vlé palé dè sélébrasion a 150è lanné arivé a Zendien an péyi an nou. Pannan etsétéra tan, pannan twop tan, pep é kilti zendien la té méprizé. Rèlijion a yo té konsidéré pi ba, pi mové ankò ki kenbwa Neg-la. An kontan vwè ki tou sa pwan lavol jod-la, kè nou ka asimé apò kiltirel lasa, kè nou fiè dè’y é, an lespri an mwen, sé an viktwa a lakréyolité ki la. An ka pwofité pou salié dé moun, dé makè é gran-grek zendien ki an sal-la aprémidi-la kivédi Camille Moutoussamy, ki sòti pibliyé on bel liv, Eclats d’Inde¹¹, épi misié Jean-Samuel Sahaï, on Gwadloupéyen ki ka préparé on liv a bokantaj-pawol èvè mwen asi lakréyolité é lendianité. An ka salié osi Gerry L’Etang ki fè on bidim travay asi kilti zendien Matinik é ki ka préparé on liv-mémwa asi dènié Zendien péyi an nou ti té konnet palé lang tamoul la, Antoine Tangamen ki ti non a’y té Zwazo. Pèmet mwen mandé Mayémenn, Nagourmira, Katlayen, Bomi, Maldévilen é Madouraiviren pwotéjé nou tout ki la-la pannan simen a KABAR an nou la!

Kon zot pé vwè, an pa ni optimis ni pésimis: rézila a tout lo goumé-lasa ka dépann di on sel biten: détèminasion an nou.

Raphaël CONFIANT

Notes

¹ Edision Gallimard.

² «La Société d’Habitation à la Martinique», Presses Universitaires de Lille, 1975.

³ Adan «Poétique de la Relation», édision Gallimard 1993.

⁴ Gadé-vwè «La Charte culturelle créole », édision GEREC, 1982.

⁵¹ «Grand parad, ti kou baton», édision a L’AGEG, 1971.

⁶ «Pawol an bouch», édision Désormeaux, 1976.

⁷ «Bel Bel Zobel», édision Grif An Tè, 1977.

⁸ «O Mayouri», édision L’Harmattan, 1981.

⁹ «Jou Baré», édision Grif An Tè, 1979.
¹⁰ Gadé-vwè «Lisette quitté la plain» di Duvivier de la Mahautière (1757) ouben «Choucoune» di Oswald Durand (1885).

¹¹ Gadé-vwè pawol-douvan a Gilbert Gratiant adan réédision «Fab konpè Zikak» an 1982.

¹² Edision L’Harmattan, 2003.