Doudou
Menm si sé pou nou kouché do pou do
Bannou chofé po an kabann kanmenm
Doudou
Menm si sé pou nou kouché san dégoudi machwa
Annou kabanné on ti-gouté
San chastren niyaj ka ba sòlèy masko
Lapli fifiné si nan kaz ka ba tòl karès an do
Annou profité titak pou ba lanmou on ti chans lofé
Doudou
Lanné ki lanné ja filoché janmsé si nou
Ki fè lanvi rété pa ka érisi désann
Pli ba ki an bòdaj a lonbrik
Toupi-fwans ka dodo nan dra plotonné
Labèlaktris
Bèl boulfé si kont
Tan dja pasé si tan
Ki ba chak zobèl po a kò a-w
Gou ék lodè a lanmou ki  rété lanké nèf é fwé an sèvèl an mwen
Kon gran-gwo moman a dousin an fenfon ravin
Bèl tan pousyè tan pa ka rivé dolé…
Mi tan a kip épi élas rivé
Mi doulè é mi blès ka pran lanmen
Doudou sé fòs ka manké mwen pou an fè lèspri a-w pèd-tè
Jistan chofwèt a lanmou palanké nou an syèl douvan-jou
Doudou
Bobèch bésé
Fannal pèd flanm
Nou sav sa nou sav é sé pousa
Dwèt an kwa ka baré bouch

Max Rippon. Contribution à la journée du créole 28 OCT 2009