Pas an savé an bout a lavi sé lanmò ki ni
An pé ké pléré-lavé kokozyé jistan nou dédousi ma
Pas an savé fò lavi bout pou lavi pran valè
An vlé chayé moun alé an chimen koton
Ou pran tousa tan kadé

Pas an savé mouch menm pé ké nòz pozé zèl
Si hotè mach lèskalyé ou planté an niyaj
Pas an savé on zétwal vin èché-w yè oswa
Pou té montré-w lapas si lawout a sòlèy

An ka di-w
Patrik vwayajé byen, san fè lenpridans
Ou ké woukonnèt nou
Paskè nou ni lenj blan, nou ni lapenn,
Chagren, épi doulè an vant
Voyé limyè désann si nou
Pa di Bonyé, sa ou réisi fè si latè
Mé mandé Bondyé, di nou sa ki ka manké pou fè
Pou fè solèy kléré sèvèl an nou, lannuit kon granjou

Pas an savé èvè on gita kòdé si men gòch
Evè on vwa ki ka fè chivé a niyaj,
Filoché kon lèt ka déléyé
Ou ké mèt jounou atè, pou plédé kòz a péyi an nou

Mwen é tout tcholé zanfan bata ki rété èstébékwé,
Nou ké véyé solèy san fòs lévé 
Nou  ké èspéré labat-jou fin kasé, dèyè do a kay
Pou nou vwè, si ni mwayen détòtyé pawòl ou néyé an mizik,
Pou limyè liminé dènyé kaklen ankayé an péyi an nou

Pas an savé, on ti-pawòl ka monté
Vin gran palé, lè mèt a lafè viré do
Jòdi-la… sé zyé ou fèmé ti-fwè
Sé vwayajé ou vwayajé kon Elwa
Ou lésé tout maman kréyòl, men anba machwa

Afòs yo kouri sékilè a-w
Afòs mové lang tèwbolizé kò a-w
Ou lésé-w glisé adan on dòt pyès a nankaz
Ou pa pati yo di
Sé on sèl ti bokanté plas ou fè
Nou…
Kounan zanfan bata ki pèdi lavwa
Nou ké toujou nonmé non a-w jòdi kon yè
Pas sé chaj lanmou-la yo té ni pou sansib a-w-la
Ki fè la krent ou té ké pati kontré Bazil
Fè yo kouri mò a-w tout-la-sent-jouné
Yo di ou viv vi a-w san krazé on foumi
Mé jòdi-la, Patrik, fontèn lanmou ka dousiné kè,
An tout péyi-la
Sé son a vwa a-w ka rébondi an ravin épi koulé
Dépi ou kaskòd si lavi, ti-fwè…

Max Rippon
Durocher le 22 septembre 2010

 Viré monté