Tanpwisouplé
Pasé men a-w asi po an mwen
Menm si ou ka touvé-y chifonné
Pli rèch ki dous
Karésé mwen kanmenm ankò
Si ou té savé
Kijan kè an mwen andidan
Ka fonn kon miyèl anba sòlèy
Lè men a-w ka pwonmné lanmou si po an mwen
Gadé tèt koton an mwen an mitan zyé
Ou ké vwè bari dlo lanmou
Ka koulisé pli dous ki pléré sikré an kè an mwen
Kriyé mwen pa non-sanvann mwen
Menm si Papi épi Mami
Ka sonné bèl kon flè siwo an bouch a-w
Non an mwen manman ban mwen
Sé sèl biten ka rété mwen ou sav
Avan zyé an mwen fèmé pòt si granjou
Kontinyé ban mwen ti-non an mwen
Pou chak jou ka rété mwen si latè a Bondyé
Fè mwen chonjé
Ki mwen osi
Malgré tousa tan ki ja pasé é boulvès an sibi
An fèt ti-bébé ki lévé ka souri rizèt an tré

An savé lè laj ka pran douvan é moun ka vin vyé had
Malgré losyonné é poudré é vazlin an chivé
Lodè a kò ka chanjé pou viré mové
Apa pou di sé pit an ka pit
Sé santi an ka santi lodè doulè penn épi mizè
Kò an mwen dja vin pòk
I ka pati pran labann mizi an mizi
Tanprisouplé atann an viré do é boké palisad
Pou kriyé mwen kò-la

Max Rippon
Bitasyon Durocher. Grand-Bourg

Contribution à la Journée internationale du créole, 28 octobre 2011