Di mwen Bondyé pouki
sé yo ki fè nou akwè…
konplo a nèg sé konplo a chyen
Pouki Bondyé sé yo ki di
nèg pa sa vwè nèg pòté sak
Pouki Bondyé yo di osi
nèg ka détenn afòs imité
Poukisa
fò nou pwan tousa fè
avan nou pwan santiman
Poukisa
fò nou toujou woukoumansé
chèché libéré péyi an nou
Poukisa
pawòl kouyon kraché
sé sa nou vlé halé-gobé
Di mwen Bondyé… pouki
nou sa vonmi manman
pou nou valé bèlmè
Pouki Bondkyé
fò manman-zanfan péyi la
pléré tout dlo a kò a yo
lè manglo lannwit
ka chayé pitit a yo alé… kon rat

Pouki Bondyé
fwè é sè an mwen
lé ti tchatcha
sé zanfan bata
ki pa ni dwa wouklé-anmwé nan bwa

Pouki Bondyé
lé gwo kyap an péyi konki
ka koupé épi haché
sé zanmi a labé
Di mwen Bondyé

... pouki
mwa-d-mé si péyi an mwen
sé van anrajé ka volkannizé sòlèy
Di mwen Bondyé
poukisa...
fò nou
lévé lè klòch sonné
fò nou
sizé lè yo di nou
fò nou kouché lè nou pé
é fò nou di...
mèsi mouché... tanpwi souplé
Di mwen Bondyé
pouki
nou ka fèt san mandé
nou ka viv zyé fèmé
nou ka mò...
bouch ouvè
afòs nou di-w Bondyé
Tonnè di-dyé
fò on jou sa arèsté
Poukisa...tousa...
Tonton Bondyé

Max Rippon extrait de
"Débris de silences" Editions Jasor