Tanpwisouplé pasé men a-w asi po an mwen
Menm si ou ka touvé-y chifonné pli rèch ki dous
Si ou té savé kijan kè an mwen andidan
Ka fonn kon miyèl anba sòlèy
Lè men a-w ka pronmné si po an mwen

Gadé mwen an mitan zyé
Ou ké vwè bari dlo lanmou
Ka koulisé pli dous ki pléré an kè an mwen

Kriyé mwen pa ti-non an mwen
Menm si papi épi mami
Ka sonné bèl kon flè siwo an bouch a-w
Non an mwen manman ban mwen
Sé sèl biten ka rété mwen
Avan zyé an mwen fèmé pòt si granjou

Kontinyé ban mwen ti-non an mwen
Pou chak jou ka rété mwen si latè a Bondyé
Fè mwen chonjé
Ki mwen osi malgré tousa tan ki ja pasé
An fèt ti-bébé ki lévé ka souri an tré

An savé lè laj ka pran douvan é moun ka vin vyé
Malgré losyonné é poudré é vazlin an chivé
Lodè a kò ka chanjé…
Apa pou di an ka pit
Sé santi an ka santi
Kò an mwen ka pati mizi an mizi
Tanprisouplé atann an viré do pou kriyé mwen kò-la

Max Rippon,
Durocher le 9 mars 2011

 Viré monté