Es fanm sé lak
Pou sé fanm ka sèvi fwé
Pou halé nonm vin rimé an dansé
Es fanm toutouni sé chopyo
Pou sé fanm ka fè bèbèl
Pou fè noum varé si loto nèf
Fanm pa bòbò ka founi kabolo

Fanm sé  manman
Fanm sé ti-fiyèt
Fanm sé ti-sè
Fanm mérité rèspèkté

Es fanm sé pisa dalo koronpi an sòlèy midi
Pou yo fè fanm sèvi twèl-a-pyé é lavèt
Lè wonm bandé pongnèt a nonm an bivèt

Fanm sé manman
Fanm sé ti-fiyèt
Fanm sé ti-sè
Fanm mérité rèspèkté

Fanm ni valè
Fanm ni fòs épi kouraj
Pou trenné gwo-vant pannan nèf mwa
Fanm ni valè
Fanm ni fòs épi kpouraj
Pou chalviré on kaz avan lannuit fin tonbé

Fanm sé manman
Fanm sé ti-fiyèt
Fanm sé ti-sè
Fanm mérité rèspèkté

Sa rivé fanm rantré pou pen é sòti é vyann
Sa rivé fanm mandé Bonyé mété lanmen
Pou paré van a mizè ka fésé si do a yo
Mé sa rivé fanm rété doubout fixé lavi
Pas nou savé tété a manman pa ka janmé sèk lèt
Nou ka di fanm sé ajounou an kounan nou ka di zòt mèsi

Max Rippon.
Contribution à la journée de la femme, é pou fété tout manman

 Viré monté