Potomitan

Site de promotion des cultures et des langues créoles
Annou voyé kreyòl douvan douvan

Chiraj

Max Rippon

Asifi yo di bim
Nou pa atann tann léko rébondi an ho mòn ni janbé koulé
Nou ja parté
San èché si van-nowdé ka voltigé varèch
San prangad chik an pyé a kanklo
Sé paré nou paré mèté difé an pay sèk ki sové anba karèm
Asifi yo di bim
Sé parté nou ja parté
Kon foumi ladyèt ka foré si babyann
Manfou si solèy ka kou lèpri nékwafé
Sé bim yo di épa
Alòs annou débréyé jis ti kayi dèyè-manman
Sé bim yo di épa
Ban nou dégrenné dènnyé ti pat fig ki pèd sik
Fò pété fyèl a péyi la pou sòlèy ki sòlèy niché gou a lalwé
Asifi yo di bim
Tout krab hontèz an mang-flo
Tout sémafòt ki té bousyè an tè gras bandé zékal pou lévé gro-mòdan
Mi yo di bim-parté
Kous pati san fizi pété
Sa ki ni soulyé séré kalpyé
Sa ki san koumbit kouri tou-ni-pyé
Kous pati san sonnkès sonné
Lanmè kwazé
Vou ki ka tété sèl dèyè do a brizan chikayé
Pòté lanmen voyé soukou
Palé pou di nou ki gangné  ki nou pèd
Péyi Gwadloup an boulvès…
Gwo mal malfini ka tété lèt an manmèl a niyaj
Ban nou kanf pou dousiné blès
Ban nou awmwaz pou opozé nou dépalé kon lakatchia
Ban nou konsoud épi gwo-ten déléyé an dlo bwak
Pou ba lalin on ti chans bokanté doukou san tòtyé zétwal…
Konbòch ki té ansanm jouklé an konvwa
Lésé sòk a chari planté pèd lakat an savann
Boustabak é bilbiten ka bay bal an siyon ti-kann chalviré
Dlo bwa ka pran chofi
Vè a ma ka lélé ké
Tan maské an ho mòn
Péyi an mwen pran lavaltori
Zozyo maren ka pran bwa an mové doukou

Max RIPPON
7 Jan 2010

Viré monté