Potomitan

Site de promotion des cultures et des langues créoles
Annou voyé kreyòl douvan douvan

Mi nou bèkèkè an péyi-la

Max Rippon

Lavi vin awad
Pas afòs fè
Nou fè lavi pèd sik
Di bonjou réponn mèsi
Vin ka kòché gòj kon zo a pwason-awmé
Si lavi pran gou a lalwé
Sé pas nou déléyé sòk a chari an nou an dlo-bwak
A pa lavi ki chanjé zépòl sé nou ki pèdi lawout
Sé nou ki pran mès rapòté an bwaskò
Sé nou ki pran dlo-mousach pou lèt
Nou égaré lawout avan tibrin ba mouch-a-fé tan pran lavòl an ti-bonm
Ki fè nou pèd jan nou té ka véyé jès a niyaj an syèl
Nou ouvè lawonn pou antra pran lanmen
Antra mété nou kapon kon piskèt ajounou douvan békin
Nou maké krédi nou ka douwé asi sab cho
Lanmè dékwazé souyé tout mak a sab-mouvan
E nou pèdi lakat sèl an tounikèt
Yo wouzé nou an pisa kowonpi
Yo anpizé nou kon wòb-a-kò plotonné an tré
Yo étenn difé si nou pou kawo cho pa menm rivé goré nou
Nou vini kon pakèt hangnon chifonné ka ba lari chenn
Nou pyépoutèt
San savé si sé alé nou ka alé oben vini nou ka vini
Nou enki la sizé asi zayigo an nou ka véyé sòlèy fwadi
Annou kouvé sa ki ka rété
Pou fè sa ka rété woupran boujon
Fò nou pitité sa ki té bon
Pou sa ki té bon fè nou wouvini dòktè
Sé sa nou bizwen pou nou las viv alavaltori an tras
Péyi an mwen pèd zoban
An ka mandé on ti fannal limé pou nou touvé chimen
Fò nou di awa
Apa imité ké ba dlo-vésèl gou a vizou
Fò nou fouyé bwèy a mang sèk
Pou konprann pawòl zévan krab-hontèz lésé ban nou
Fò nou tanmizé pousyè
Pou limyè douvan-jou montré nou ki koté solèy ka lévé
Tan rivé pou chak tou a zéguiy touvé bon fil pou koud lavi
San pèd tan fofilé lavi...

Durocher, 5 octobre 2019

Max Rippon

 Viré monté