Kréyol an-mwen pou di-w

lafwanchiz-vérité

pa kréyol touléjou

ni kréyol a toutmoun.

*

Lè an té on timoun

yo chayé-mwen alé !

Yo menné-mwen lotbò

kréyol an-mwen tizi.

*

Tou kwindik, tou koré

an séré-y adan-mwen

I té pèd dlo-sous a-y

pa té fo-y vaporé.

*

Tou tizi, tou kwindik

I té fonnkyè an-mwen

I té zèb ka grandi

bò-lariviè olwen.

*

I té lang pou révé :

té tini on tifi

yo té chayé-alé

lotbò dlo-sous lavi

*

Kréyol an-mwen jòdi

sé on bonbon-siwo

pou bouch an-mwen palé

san pon laliénasion.

*

Sé on lang pou révé

sé zèb bò-lariviè

san pon kalkilasion

sé sièl èvè limiè.

*

Sé lang a anvoutman :

i toujou plen chalè

i toujou plen koulè

i pa konnèt mizè.

*

On lang adoumanman

Toujou èvè lòdè

Toujou èvè dousè

I pa konnèt touman.

Epi

pou bien di-w tout

Lafranchiz-vérité

kréyol an-mwen menmsi

I on tizing brenzeng

Sé-y i mwenmenm an-mwen.