Si tan-la bèl botan
Si van-la pòtalan
mwen Frégat yo kriyé Malfini¹
san janmé  bat zèl
adan on batzyé
an pé bat lanmè
lajouné kon lannuit
ka rété ka planni
ka monté lèskalyé-syèl
oswa ka désann ora dlo
é san janmé mouyé onsèl plim
trapé pwason volan ka kouri
douvan  pwason -varè.
Sé lè péchè ka vwè-nou sanblé an syèl-la
yo ka sav ola sé ban pwason-la yé.
Déparfwa
lè tan-la anboulvès
si van-la alaprès
ka fè kouboulin
an ka pwan chimen montangn
é mi sé la moum atè
pa ka byen vwè-klè
ka apèsivwè-mwen an tèt a syèl-la
épi yo ka di gay « on mal fini ».
Awa ! An pa pon mal fini
Epi fo sav
an pa anfanmi èvè Malfini-savann
désèrten ka kriyé mansfenil².

(Ektò Poulé, Kapèstè novanm 2015)

Notes

1. Frégate superbe dit malfini: Fregata magnificens.
    
2. Mansfenil ou Petite buse: Buteo platypterus.
   

Viré monté