Potomitan

Site de promotion des cultures et des langues créoles
Annou voyé kreyòl douvan douvan

Calendrier des arbres
Novembre

Bwa-kannon1

Hector Poullet

Cecropia schreberiana. Photos F.Palli.

Ambaïba
Sé non-lasa sé Kwayib-la  té ban-mwen
an tan Dyab té tigason.
Zòt
kèlanswa non zòt ké vlé kriyé-mwen
Bwa-kannon
Bwa-flo
Bwa-twonpèt
zòt konnèt
a pa pétèt  
é a pa pou hak
yo ka ban-mwen
sé kalité non-lasa jòdi-jou.
Kannon poudavwa
lè mwen adan difé an ka pétayé.
Flo poudavwa
an pli léjè pasé dlo.
Sé èvè mwen yo fè
pli méyè pripri
kifèwvwè déserten
ka jis kriyé-mwen
Bwa-kanno.
Twonpèt poudavwa
sé èvè mwen
Kwayib té ka sèvi
pou souflé
pou fè mizik a dansé a-yo.
Mé pa kwèdi sé tout an-mwen
An ni onlo dòt kalité
kontèl : sèv an-mwen pé sèvi
longan pou tout bobo !

An ka pousé asi falèz
an bòdaj montangn
é an lèz-granbwa
féyaj an-mwen
sé parasòl
é  lèwvwè van ka vanté
pou fè fèy an-mwen touné-alanvè
jété zyé p’asi
tout patiraj
ola an yé
zòt ké vwè
tout lanviwonaj-la
ka blanchi
k’on zéklè
poudavwa anba fè-y an-mwen
sé pousyè-lajan !

E. Poulé

Note

  1. Cecropia schreberiana Miq.: du grec «kekragein», crier, parce que les pétioles et le tronc sont creux comme les instruments de musique.

Viré monté