A pa pétèt
si zòt ja mèt tèt
anba dlo bòdlanmè
asiré zòt ja vwè
on flè
kolé asi kèk wòch
asi kèk kay
oswa asi on kal-a-lanbi
on kal-a-souda
on flè près transparan
èvè on koulè jòn  
p’asi wòz-lakansyèl.
Yo té ké di
alantou on bouch
on kouwòn filang¹ k’alé vini
èvè mouvman lanmè-la
akwèdi on brilan alanvè.
Dayè pou yonn
penga mannyé-y !
Mwenn touché
tout sé fllang-la ka anni rantré
floup !
Konsidi on Manzè-Mari
té ké fèmé pòt a-y
pou lésé anni on bouch
lèv byen séré
kolé asi wòch-la.
Plita
lè tout danjé disparèt
lèv bouch-la ka déséré
flè-la ka wouvè kò a-y
kon i té yé
k’alé é vini
èvè mouvman dlo-la.

Kanmenmsa fo sav
flè-lasa anfanmi èvè Brilan
é limenm a-y osi
i ka brilé menmjan-la.
Maren-péchè
i pa moun ka mété dlo an bouch a-yo
pou nonmé tousa ka viv an lanmè
ka kriyé flè-lasa : koukoun-lanmè.
Mwen, si an pou ba-y on non
an é té ké pisimyé kriyé-y
Brilan si pyé.

Note

1. Filang : tentacules

Viré monté