Potomitan

Site de promotion des cultures et des langues créoles
Annou voyé kreyòl douvan douvan

Panse

Kabir Hussen

 

 


Kabir Hussen
  • Sak pa ki mo fer lor sime liberte, mo santi mwa pli etranze lor later ek sovaz dan sosyete.
     
  • Zame mo ti geny ek pu geny seki to ena. Purtan mo admir li... Me pli mo mont lao, jistans granji ant mwa ek seki anba.
     
  • Mo geny degu ar bann jimunn ki anvi me per mo prezans. Enn zur kitfwa mo pu trangle ar vomi.
     
  • Pli mo geny problem, pli mo vinn lib. Pli mo vinn lib, pli mo geny problem.
     
  • Laverite li enn konesans ki detrir tu lespwar.
     
  • Ankor enn repros anver mwa: mo tro bon.
     
  • Lavi san twa, eski ena lespwar pu ki sa realize?
     
  • Bizen bwar omwen kat kup jiven pu apresye to prezans.
     
  • Dan tu jimunn bizen ena enn tiginn foli pu sorti depi lorjiner.
     
  • Ena fwa mo pa mem kone kan mo pe bajine sitan mo serye dan mo bann bajinaz.
     
  • Dan bann zur fet ki suvan nostalzi anvayir nu.
     
  • Kan silans deranz twa, al rod lape dan tapaz.
     
  • Laplipar zafer ki mo pa ti kontan avan, avek letan mo apresye zot avek tu mo leker. Mo pa aprann apresye zot, mo truv zot jiferan avek evolisyon lespri.
     
  • Suvan zot jir mwa mo pena parol me zot pa konpran ki seki ti koz avek zot pa ti mwa me enn lot: lespri mwen evolye dan enn lekor mwen eksperyanse.
     
  • Ah zot tuletan, zis kan zot erer kre problem, zot blam satan. Kan zot pu kumans pran zot prop responsabilite?! Enn imen lib li enn imen responsab avek enn konsyans kler.
     
  • Beni bann lespri vagabon, kiltivater dut! Sak dut amenn nu ver enn konesans ek sak konesans ver enn lot dut.
     
  • Serpan pa pik so zanfan me imen fer li avek enn konsyans trankil.
     
  • Rakont li ki tonn eksperyans parey uswa pli pir ki li, samem pli gran konsolasyon. Li pu truv rekonfor dan to bann maler. Bann kamarad zot la pu sa.
     
  • Suvan dan bann fami posede ena lenzistis. Bann tiran rekonpans seki sumet ek penaliz lespri lib.
     
  • Pa bliye, fodre ena enn tiran pu ena enn rebel.
     
  • Ki sannla ena tor ? Seki pena konfiyans uswa seki pa enspir konfiyans ? Anverite, tu lede ena rezon pu pa donn konfiyans enn sans.
     
  • Bann pli gran sistem zot san okenn dut seki enpoz plis lalwa.
     
  • Kuma lemond vilen kan mo get li depi to lizye !
     
  • Enn lespri bien evolye dan enn lemond kot bann panse bien primitif. Mo pe viv sa degu la tu lezur.
     
  • Seki nu rode, ena valer devan nu lizye ziska zur ki nu posed li.
     
  • Enn vieyar jir avek so tizanfan : Trankilite, samem pli enportan dan lavi. Pa fer mem erer ki mwa, tir leson. Marye avek enn sourd muet.
     
  • Seki viv trankil dan so kwen, pena move manyer vey zafer ek fer palab, seki koze zis kan bizen, samem ki jimunn apel surnwa ek arogan.
     
  • Si li pa wi, li pa neseserman non. Me tro suvan zot onte pu jir pa kone.
     
  • Zot pa pu tarde pu komet premye krim ki zot mem ti viktim : rev lavenir zot zanfan.
     
  • Suvan nu truv seki nu anvi truve, mem dan lekontrer.
     
  • Pena nanye pli fatigan ki bizen koz avek enn uswa plizir jimunn enbesil.
     
  • Kan labus vinn enn lennmi, ena lentere ferm li.
     
  • Mo bien kontan prezans bann seki tuletan resers konesans. Deki zot deklar ki zot inn konn tu ek zot resers inn termine, zot vinn ensiportab.
     
  • Si to anvi vinn enn gran santer, li fasil, lamant lamizer ki to ti eksperyanse ek eksprim to fristrasyon : denons swajizan kriote lemond materiel, ziska jir ki lemond materyel li satanik, wi twa ki pu vinn pli seleb parski preske zot tu santi zot mizer… mem dan enn peyi kot ena plen oportinite pu amelyor zot konjisyon.
     
  • Ena buku jimunn truv laplipar travay manyel grosye ek zot pa pu rod fer li mem si zot dan lamizer, mem si zot bizen tal lame, zis akoz enn ti lejikasyon ki zot inn genye. Manjian vantar.
     
  • Personn bizen pa bliye zot vie zur. Me li pa enn rezon ki, kan zot inn resi arive, zot viv kuma dan zot vie zur.
     
  • Kan de fam pe koze, li pa difisil pu kone ki pe okip zot.
     
  • Bann fam, kuma dan preske tu bann gran relizion ordone, bizen kontrole par zot papa, frer ek mari. Tu jimunn ki anvi viv dan enn lemond moral truv sa lalwa la lozik. Lor sa size la, laplipar imen prefer imoralite.
     
  • Erer enn poet, apel maryaz. Lanfer enn poet, apel fidelite.
     
  • Pran pu metres fam ki ena jiferan panse avek twa, to pu admir la jiferans.
     
  • Pran pu epuz fam ki ena mem panse avek twa, to pu admir seki to ete.
     
  • Suvan zot jir mwa zot pa kone kuma mo pu fini… kuma jir zot kone kuma zot pu fini.
     
  • Res anplas pli jifisil kuma stabilite ki galupe.
     
  • Pu donn lekzanp, nu bizen vinn lekzanp la avan.
     
  • Zot jir mwa si mo aksepte li, mo lavi pu sanze. Mo pu aret geny ku. Purtan kan mo get zot lavi, mo truv mwa buku fwa pli dan bien.
     
  • Enn wiski dan enn bistro, lespri vid, get samji maten kuma kumans bien.
     
  • Tuletan nu tro okipe avek lemond eksteryer ziska ki nu fini par perji seki pli enportan.
     
  • Bizen fer atansyon avek ki u pe bwar parski samem fakter pli enportan.  Pli zur pase, mo pli pran konsyans ki meyer konpayon avek ki bwar vinn enn veritab plezir, li momem.
     
  • Mo pa ariv ferm lizye lor move kote enn jimunn parski mo pena labitid bwar dan ver ki lezot inn krase devan mwa.
     
  • Mo pena enn bon sans de limur parski mo pena ni pasyans ni pasyon pu ekut bufonnri.
     
  • Vre kesyon sorti depi labus bann zanfan.
     
  • Bann non krwayan servi rezonnman. Bann krwayan sumet a zot emosyon. Akoz samem priye paret enn aksyon plito feminen. Zor rar bann fam ki pa krwar!
     
  • Li pli rezonab pu paret fu ki paret rezonab dan enn sosyete fu me krwar li rezonab.
     
  • Li res vante ki li kiltive kuma mwa. Pa fasil pu sibir enn tel ensilt tulezur!
     
  • Get maryaz so bon kote… To pu geny enn jimunn lor ki to pu kapav tir to bann ner.
     
  • Tro fasil pu kuyonn fam. Ankor enn rezon kifer ena zom pa le tronp zot fam.
     
  • Pa ki mo rankinye, me mwa mo ena lamur prop.
     
  • Pran pu partner enn mandayer kinn deza fayit dan le pase par so prop foli? Dezole mo pa ase kalifiye pu sa !
     
  • Repete ki to entelizan fer twa paret lekontrer.
     
  • Premye zimaz ki vinn dan mo panse kan mo truv enn konba vyolan ki imen konsider kuma spor, de koson pe zue dan labu.
     
  • Sumisyon par prop volonte : enn konportman degradan dan ki imen truv enn plezir imans.
     
  • Zet enn kut ros lor mwa, mo pu zet jis lor twa. Kitfwa plis mem.
     
  • Pena personn ki kapav ena plis pasyon dan lamur ek plis kriyote dan laenn ki enn zanfan.
     
  • Mo pa krwar ki bonjye ti kre fam apartir enn zom. Zot totalman jiferan sirtu kan zot koze.
     
  • Pli gran eksitasyon dan lager li dan kont atak.
     
  • Pli gran plezir dan enn aksyon anver enn lot jimunn, li kan mo resi enfliyans ek kontrol so panse.
     
  • Tu jimunn bizen ena drwa swazir an tut liberte anver ki li anvi sumet. Mo prefer anver enn lide ki monn kre, ki anver enn lide etranze.
     
  • Mo geny bon kan seki mo jir fer lezot geny bon.
     
  • Buku fam anvi mo lame. Lapares fer mo fierte.
     
  • Si mo pa ti bwar zot ti pu jir mo enn sen. Si mo pa ti anseny dut zot ti pu jir mo enn pret. Si mo pa ti ena lamur prop zot ti pu jir mo enn gran leker.  
     
  • Dan nu peyi, zis batiman ki evoliye. Mantalite laplipar jimunn bien retarde par plizir siek.
     
  • Ena gran progre dan lamizik lokal me zis kote stil. Laplipar bann teks li plizumwen kuma enn jisk reye lor topik lamantasyon lor lamizer. Li ti pu bien meyer si zot ti enstrir sa parti jimunn ki tuletan res mizer la, kuma viv, ekonomize pu enn meyer lanjime ek non pa, amize aster kanmem jime pena nanye, ek travay pu sorti depi dan sa leta deplorab la ek non pa, danse pu bliye to mizer !
     
  • Bien rar bann jimunn jir seki zot panse ek zot inn rod enn rezon nob pu kamufle zot ipokrizi : pu prezerv lape. Zot apel seki fran ek jirek bann futer dezord. Akoz samem kot mo pase, mo pa pas inapersi.
     
  • Mefye bann jimunn ki koz buku parski li pa pu sokan si jime to vinn so size konversasyon deryer to ledo.
     
  • Ofer zot to liberte, zot pu anprizonn twa ar plezir.
     
  • Loder larzan atir tu parfen ek bote larzan maske tu vilen.
     
  • Imen li enn sajik ki geny plezir dan krwar ki li mem lakoz ki so eks partner dan dezespwar.
     
  • Monn fer buku erer dan mo lavi ek kitfwa mo pe fer ankor. Me pena okenn regre. Prefer viv lib, fer erer ek aprann depi eksperyans, ki swiv nenport enn gid mem si avek li nu an sekirite.
     
  • Kan tu pe pas bien, letan pas vit ek lepase paret bien lwen uswa etranze.
     
  • Oze lir ek pran konsians.
     
  • Kifer zot imit enn ansyen mistik zis par so batman? Zot pa kone seki pli enportan, li so lansenyman? Seki pli fasil zot truve me seki kontrajir zot lentere, bann egoist, zot ferm lizye.
     
  • Nanye pa res nuvo. Letan detrir tu eksitasyon. Li vre osi pu relasyon imen mem si ena bann rar eksepsyon.
     
  • Donn konfiyans enn sans vejir donn desepsyon enn sans.
     
  • Poet ek panser, nu bann koleksyoner admirasyon ek malejiksyon.
     
  • Sak sistem esey elev kalite lavi enn jimunn, ki lor so kote spirityel ek materyel. Si mo pretan krwar dan enn sistem afen ki mo kapav vinn enn manb ek zwir bann lavantaz ki sistem la ofer, li avan tu parski mo rod mo lavantaz. Seki ofer plis lavantaz limem ki atir plis mo latansyon.
     
  • Mo pastan favori : jir la verite.
     
  • Ena fwa mo prefer mo ti surd akot mo zorey ti pu nepli tann bann ensilt kuma bann sante ki resanble abwaman… Purtan samem ki pli popiler ek lamod. Me lamod pa vejir zoli.
     
  • Nu bann genyan ek/uswa bann viktim sirkonstans. Lavi li enn larut ranpli ar obstak, kot sak obstak li enn eksperyans.
     
  • Pa eseye, li pu nanye. Zame to pu kapav bliye santiman pli profon tonn resanti pu premye fwa sirtu kan linn terminn dan enn absirjite - dan enn imiliasyon.
     
  • Kan zot pena repons, zot jir mwa pa poz kesyon lor jivinite sinon mo riske vinn fu.
     
  • Enn sufrans resiprok ki pa kapav devwale. Enn fierte resiprok ki anpes reparasyon.
     
  • Nostalzik kolonyal, angle ek franse rate, zot pe propaze kuma bann viris danzere ki dusma dusma, pe detrir langaz morisien.
     
  •   Enprovize : Lar ki mo apresye plis. Mo demann mwa suvan kuma mo fam kapav siport mwa. Zorji mo kumsa, avek enn bon rezon ek jime, mo enn lot avek enn lot bon rezon. Enprovize vejir fer krwar…
     
  • Zame nu kapav kone vreman ki ena dan leker ek lespri enn jimunn, erezman!. Si nu ti kone, zame nu ti pu kapav ena kamarad.
     
  • Koz tu me pa demann larzan. Mem bann pli gro reken sove sitan sa fer zot per !
     
  • Partu kot mo ale, mo sarye mo gran lagel ki tuzur pre pu deranz bann lespri andormi.
     
  • Imen kontan kan donn zot lenportans. Pli to donn zot lenportans, pli zot pu admir twa parski san twa, zot pu santi zot san enportans. Sa eksplik bien kifer zot jir, kamarad li nu vre rises.
     
  • Monogami li lakoz prensipal ajilter pu bann zom.
     
  • Pa santi twa dezyem. Mo pa enn sovaz ki met nimero lor bann pli zoli kreatir lor later.
     
  • Akoz langaz morisien batar ki mo truv li zoli. Parey pu Lil Moris.
     
  • Mo lekor li kuma enn lakaz ante ki abrit bann lespri malefik.
     
  • Pu geny loner dan sosyete, to bizen ena enn konportman ki sosyete truv onorab. Mwa mo parmi bann ki viv lib ek les lezot koze parski mo liberte vo buku plis ki seki lezot panse.
     
  • Bann jimunn inn rekumans lir ek laplipar gras a bann liv komersyal.
     
  • Zot rar, bann zoli lekor ki posed zoli leker!
     
  • Bann kamarad suvan rod montre nu feb, pu ki zot geny lokazyon vinn dan nu ed. Imen tuletan rod enn oportinite, sinon kre enn, pu montre ki zot servyab.
     
  • Si ti ena zis de imen ki ti anvwaye lor later, ek nu so bann desandan, alor nu enn gran fami ensest.
     
  • Apart lamur, zis larzan ki kapav sanz enn jimunn ek kontrerman a lamur, suvan li enn move sanzman.
     
  • Pli nu fuy enn krwayans, pli nu jistans granji depi li, si seki nu pe rode apel lozik.
     
  • Seki perji, li enn perdan. Seki pran perji, li enn kapon.
     
  • Fasil kuyonn enn kuyon, me si to esey kuyonn enn malen, li pu met enn laglas devan twa.
     
  • Kontan enn jimunn pa ve jir esey amenn li dan fason ki to anvi, me aksepte li fason li ete ek ankuraz li pu vinn seki li anvi.
     
  • Mefye zot ! Si li pena vis, li enn ipokrit, pa enn poet.
     
  • Kan mo bwar jiven, mo geny enn sansasion ki mo imortel.

Kabir Hussen

 Viré monté