Potomitan

Site de promotion des cultures et des langues créoles
Annou voyé kreyòl douvan douvan

Fanm Soley

Didier Destouches

Ou ka brilé tout rasyn a lowgeil an mwen
Douvan zyé aw mwen ka dévalé mone a kouraj
Ou ka rimé tout dlo é siwo ki ka koulé an didan kô an mwen
Ou ka fè mwen chèché tout pié mango pou lombraj
Difé an kô an mwen , difé an kô an mwen !
Pipirit po ko chanté, fwégat po ko pwan lanvol
Mwen ka mandé bon dié on ti la pli si tôl
Pou mwen pé sa vlopéw épi dlo a lanmou
Pou dousiné épi rozé difé a kè a vou
Difé an têt an mwen, difé an têt an mwen !
Kô a vou doudou kon soufriè ka lagé lav
Po aw doudou kon rivyè lô ka koulé adan savann
Ki jan ou fè inmé mwen? Pon moun pa sav
Jou ka ouvè pou vou doudou, es ou ké sa konpwann ?
Difé an kè an mwen, difé an kè an mwen !
Ou sé fanm ouwagan, fanm boukan, fanm volkan
Ou sé chalè a péyi la ka baré mové tan
Ou sé koulé, ou sé limyè, ou sé doulè
Ou sé kè a soley ka ba lespwi an mwen la wozé.

*

 Viré monté