Potomitan

Site de promotion des cultures et des langues créoles
Annou voyé kreyòl douvan douvan

KREYOLAD 561

Bal kasé violon dan sak

27.1.2015

Jid

Simenn pasé pandan kannaval la, menmsi té ni gran chawa, pa té ni bwabwa anlè sé nonm politik la. Mé ou sé di sé madanm lan ki an politik la, chien pisé anlè yo.

Adan dé parti, ki dapré yo ka maché a dwet pas yo pa anglé, ni dé fanm ki pran fè flap!

Ni yonn ki matjé adan gran jounal-la an an artik éti i ka palé di moun ki lé janbé pak. Eben yo pa tadé pou fè’y janbé pak. Yo fè’y pé net!

Kantapou pabò an parti ki pito an mitan, yo di menmsi fanm pou ni la parité, poulemoman sé nonm ka mennen.

Kidonk, lè ou adan an parti fok ou mandé la pèmision pou yo baw lod matjé an artik, sinon yo ka fè’w janbé pak lamenm. Sé sa ki la démokrasi. Yo pa lé dé mo rasi. Pa ni rigolad pou fè moun ri.

Mé es ni fanm ka rinaflé bien?

Man pa sav, é man pa lé sav non pli, mé man ka kom konstaté yo ka torpiyé yo. Mwa’d mas sé poko atjelman, fanm poko ni dwa di ayen san yo pa ba yo lod.

Manniè sa ka alé la-a, épi sel Asanblé-a i ka sanm sa k écho, pas fok atout fos yo pou kité plas ba sé madanm lan.

Sé boug la, ki yo lé ki yo pa lé, menm sa ki pa lé tann palé di laparité fok yo ké pran dispozision yo. Avan yo té ka mété fanm ki té an gou yo, mé atjelman sé fanm ka réklamé plas yo. Epi sa yo mantjé! Yo pa lé pasé pou fanm adjendjen ankò, sa pé ké pasé konsa.

Antouléka fanm ka mandé plas yo, é yo fout ni rézon pou chanjé tet sé politik la tibren.

Jid

crabe

Sommaire Kréyolad

 Viré monté