Potomitan

Site de promotion des cultures et des langues créoles
Annou voyé kreyòl douvan douvan

KREYOLAD 545

Liminasion

7. Novembre 2014

Jid

Photo Tony Mardaye.

Adjilbè désidé mennen ti-ich li an senmitiè kon sa té ka fet avan. Twa jou avan, i alé anlè tonb Papa Doudou pou té sa nétwayé’y bienkonmifo.

Dé tibray kosté’y pou mandé’y pou sa édé’y. Mé lamenm yo di’y:

– Papi nou ké fè sa ba’w pou ayen, ou ni ka ba nou an ti 50 éro selman!

Adjilbè ri ba-yo, ek i di yo:

– Sa tro chè ba mwen! Pou sa ki ni a fè la-a sé 20 éro tou sel man pé ba zot!

Ni yonn ki pa pran sa, mi sa i di:

– E ga sa gran-nonm, ou lé fè lafet épi nou, ou sé an bétjé ou ki sa, ou pran nou pou esklav ou?

Sé ti jenn jan-an té paré fè an sel séméda épi Adjilbè. Misié té oblijé pa réponn, pou sa pa té alé pli lwen.

Manniè sa ka alé la-a, man ka mandé mwen es Adjilbè ké mennen sé ti-ich li a liminé. I té ja di yo, sa bel toubannman wè tout senmitiè-a épi anlo ti-limiè.

Sa vré a té ni konba kaka-bouji, mé atjelman, sé manmay anvi fè an lanmonné vitman. Ni anlo ki pa ka travay ek ka pofité fè an ti-djob vitman flap flap. Fok pa blamé yo, fok gadé sanfwa’w pas sinon yonndi zot pé rété an senmitiè a.

Adjilbè réfléchi é i désidé mennen sé ti-ich li a kanmenm, pas fok pa pè lapli par niaj.

Kidonk si nou kité plas bas é vakabon-an toutalè, sé lakay nou menm nou ké kité ba yo. Magré yo ka fè méchan, méchan fok palé ba yo kanmenm. Sa pé fè an ti-limiè an tet yo.

Jid

crabe

Sommaire Kréyolad

 Viré monté