Potomitan

Site de promotion des cultures et des langues créoles
Annou voyé kreyòl douvan douvan

KREYOLAD 493

Latousen ka tousé

25. Octobre 2013

Jid

Sainte-Anne

Sainte-Anne. Photo F.Palli.

Sé jou-tala senmitiè ni anlo alé vini, mé pa kom dabitid. Sé sa ka déranjé sé moun mò-a. Yo té ni labitid tann moun ka vini otjipé di tonm yo, tiré vié zeb, mété flè an pot épi sab pou pa ni moustik.

Mé sé tan-tala, yo kom déranjé épi dé moun ki pa ni labitid vini an senmitiè menm lè fanmiy yo mò. Apré minui anlo alé vini ka fet san rété. Asiparé menntò ka vini fè dé travay ba moun bien wo plasé, kravaté, an sé parti politik-la. La ni tout kalté, goch kon dwet, an mitan kon sa ki asou koté. Mé ou ka konstaté kanmenm lè’w bien gadé ni anlo SPPF. Sé dé (San Parti Politik Fiks). Sé sé tala ou ka wè plis, pas pou yo trapé an tot, yo kapab fè nenpot ki bagay. Asiparé yo ka fè dé bagay ki pa djè katolik, sé sa man tann, pas mwen menm pa té la.

Adjilbè di mwen i tann an opozan misié limè di:

– Lè yo wè nou, yo chélé !

Sa ki yo-tala? Man pa sav pas man pa té la, mé Adjilbè di mwen, sé boug-la kouri telman, ni yonn ki jik foulé chivi’y.

Chak lè ni eleksion sé menm manej-la, anlo boug politik  tout bò (pa djè ni madanm) ka vini pou kisiswa benyen, kisiswa asiré éleksion yo.

Antouléka, sa ka opozé sé moun mò-a pozé an pé. Yo té ké simié an ti-lapriyè oben yo vini liminé tonm yo.

Atjelman tianmay pa ka menm vini, ni pou fè konba kaka-bouji oben an ti-koulé, ni ri ozékla pou ba yo an tjè djé.

Lot jou yonn té tou tris, i vini di mwen an rev:

– Atjelman sé fanmiy-la pa ka menm vini vizité nou. Lè yo té ka pran an ti-milan, nou té ka okouran sa ka pasé, mé yo pa ka menm limen an ti-bouji ba nou ankò!

An pati ka jik adopté Aloween, an kannaval ki sòti lot péyi pabò Langlitè ek Lézétazini.

Vréman, vréman péyi nou-an tjoupoutet, gro latousen moun ka fè kannaval. Poutoutbon, ou sé di Latousen ka tousé.

Jid

crabe

Sommaire Kréyolad

 Viré monté