Adjilbè pa pran sa kon an madou siwo pies pies pies. Lè i vini wè Gi sanmdi oswè, sa té bakfoul, pa té rété plas. Poutan misié té tou kontan lè i té tann Gi-Mark fè an bel ti-parsel épi piano’y la. Lè man ké di zot misi sé an komersan, menmsi i pa ka fè konmes, zot ka konprann poutji i té si anrajé.

Brino-Nestò, an jenn dépité ww lé ranjé komin li. Mé akondi pawol la «yo pa ka fè zonmlet san kasé zé». Avan zonmlet la paré, sé lé komersan ka péyé sa: yo san ayen! Lafen lanné ka rivé, yo pa ka djè wè kliyan sé jou-tala, é sé a moman-tala yo ka fè pli bel lavant-yo. Yo ni bri an tet yo, lapousiè ka fè siwawa é pa an kliyan ka pwenté.

Sé pa komersan selman ki an banbanm, yonndé plantè bannann pa anvi popiété yo planté bannann. Yo alé jik Obrézil pou sa rivé jwenn an rimed kont an chanpiyon nwè ka ratibwazé pié bannann ek dépotjolé chan bannann yo.

Adan jaden kréyol, sé sel koté Adjilbé sav i ké trouvé tout rimed pou djéri maladi nonm épi pié-bwa.

Jid

Sommaire Kréyolad

 Viré monté