Potomitan

Site de promotion des cultures et des langues créoles
Annou voyé kreyòl douvan douvan

KREYOLAD 390

Vié-kò

21. Octobre 2011

Jid

Simenn pasé sé té simenn vié-moun. Yo kriyé sa «Simenn blé». Poutoutbon ni granmoun ka wè an mizè blé. Ni ka jik téléfoné «Alo maltraitance».

Lè ich-yo pa pati lot péyi, sa ki isi pa ni tan otjipé di yo. Ni anlo granmoun ka ped fos, yo ka fébli kon bobech san luil. Ni adan ka ped santé’yo, maladi gate vayan. Toupandan ni sa ka ped santé-yo, tan fè tan, tan kité tan.

Sa ka otjipé di-yo ka maltrété-yo. Ni sèten yich ki about yo ka fè sa san yo sav. Ni dot ki bien sav é yo ka sifonnen kont sé malérez la.

Tout sé jou-tala an sel bagay Papa-Doudou ka di sé:

– Vié jes mal dégajé!

Kantapou Lamè, an vwazin mwen, sel bagay i ka réponn lè man di’y bonjou sé:

– Vié kanman!

Sé ki Lamè pa ka djè konprann an tjoupatat adan kalté lavi-tala. Avan piti té ka kouté pli gran, é té ka pòté-yo respé, jòdijou pa ni respé pou chivé blan-yo. Zakari a menm pri pen an. Yo ka santi yo ennitil kon dé zéro douvan an chif. Si nou té ka bay o plas-yo, pétet nou té ké ni dé zero dèyè chif nou ek nou té ni titak plis riches sajes-yo.

Anlo vié-kò sé dé trézò mé yo pa ka ba yo plas-yo. Nou  pa ni tan otjipé di yo. Anlo ka tonbé malad ek ka vini Alzaymè. Lè ti-yich ka vini zayé Lamè, sé pou trapé an ti-lanmonné kod.

Manmay, annou otjipé di vié-kò nou pas jòdi sé yo mé asiré dèmen sé ké nou. Sa nou pa fè ba yo, asiré ich-nou pé ké fèy ban ou pas nou pa montré yo sa pou fè.

Jòdi konsa pou dèmen diréranman annou pa kité yo tonbé akondi an vié rad.

Jid

crabe

Sommaire Kréyolad

 Viré monté