Eske se va yon karès
Ki  fè tresayi tankou lè yon ti branch cheve
Pase bò kou sanzatann?

Ou byen ki bay plezi
Madan sara genyen lè y ap layite
Nan jaden diri Latibonit?

Oswa ki timid
Pòtre yon ti van briz k ap soufle
Sou yon flè franjipanye?

Eske l ap sonnen
Tankou lapli mwa jiyè k ap mache kata
Sou do kay tòl?

Petèt l ap swa
Tankou plim poul k ap dodomeya
Nan zorèy?

Osnon l ap peze la
Si w konn timoun ki sere yon jwèt
Byen di anba men l?

Premye ti bo sa a…

Textes extraits de «Lanmou se flè sezon», publié en janvier 2011 à P-au-P, Haïti, par Elsie Suréna.