Potomitan

Site de promotion des cultures et des langues créoles
Annou voyé kreyòl douvan douvan

Tande vwa w

Joubert Joseph

Di m non cheri
Si se lari
Ki vòlè bri pye w
Di m non cheri
Si se lapli
Ki mouye souf ou
Di m non cheri
Si se lakansyèl
Ki bwè bave w
Di m non cheri
Si se tanbou
Ki pran batman kè w
Fè m tande vwa w
Anvan vwa m fisire
Anvan kè m pati
Al chèche w
Fè m tande vwa w
Anvan m pote
Mak blese
Nan rèv mwen
Anvan chak gout san m
Pran fòm absans ou
Fè m tande vwa w
Anvan fraz yo degaye
Nan powèm nan
Fè m tande vwa w cheri
Anvan dlo je m
Neye enspirasyon m.

Joubert Joseph, powèt.
5 Jwiyè 2016

boule

 Viré monté