Ewa zetwal ewa kaptèn
Wonsi kanpe sekwe fèy bazilik
Sèt kout zèklè yon ponyen sèl
Van leve rido
Pou Dantò pase
Foukifoura foukifoura Foukifoura
Nanm ou nan nou
Konviksyon w se konviksyon n

Ou te getan chante adye w
Depi jou w te ligide twal zantray ou
Pou fè lawouze tonbe Ravinsèch
Jou Madan Kolo deside temwanye
N ap konprann tout mak san
K sou jipon tout fanm nan Bèlè

Dezafi rete yon defi toutouni
Pou n toujou sonje
nou gen miray pou n kraze
Pou n retire tèt nou nan pèlen
Adjanoumelezo ou fin ekri
Nou poko prèt pou fin li w

Ou konsole n avan w deplase
Nou pap met barikad
Douvan dènye priyè w
Pafwa lanmò se pi bon remèd pou remò
Anndan twoufoban
N ap chante pasay ou pou lavi

Yves-Mary Fontin

*

 Viré monté